Насловна

Изглед

Спомениците го заживеаја скопскиот плоштад

За една година центарот на Скопје се претвори во место во кое нема каде да се фрли игла

Од празен скопскиот плоштад, за само една година се преполни. Од ден на ден се претвора во место на кое речиси нема каде игла да се фрли. Дали само така изгледа поради се' уште заградените активни градилишта, а амбиентот ќе биде поинаков кога ќе се изгради и постави се' што е планирано, засега не може да се суди. Факт е дека „Скопје 2014“ го наполни плоштадот. И тоа, генерално со споменици.

Плоштадот се раздвижи лани на 1 мај кога од двете страни на Камен мост се поставија коњаниците Гоце Делчев и Даме Груев, со кои практично се проби мразот на листата од предвидените над 10 споменици за кои е резервирано место на плоштадот и непосредната околина. По нив се нижеа споменикот на Ченто, на гемиџиите, Кирил и Методиј, Димитрија Чуповски... Се постави и најграндиозниот, највисокиот и најскапиот споменик на војсководецот Александар Македонски. Последен во низата беше споменикот на цар Самоил седнат на трон, а допрва треба да се постави и спомен-обележјето на Неџат Аголи, кое ќе биде рамо до рамо со коњаникот на Гоце Делчев.

Плоштадот, освен со „Скопје 2014“ се прошара и со двете скулптури шмизли, скулптурата дрво и капачка. За од „празна тепсија“, како што дел од јавноста го нарекуваше, сега е преполн, за што се потрошија речиси 15 милиони евра, и тоа само за спомениците. Генерално, спомениците имаат идентични димензии, а изработени се и од ист материјал. Со исклучок на Ченто, Јустинијан Први и цар Самоил, кои се изработени од бел мермер останатите се бронзени. Сите достигнуваат висина до 5 метри, а поставени се на постамени со високи 3,5 метри. Исклучок, во секој поглед е споменикот со фонтаната на Александар Македонски. (Дс.Т.)

Методија Андонов Ченто е македонски национален револуционер и политичар, прв претседател на Президиумот на АСНОМ. Поради неговата претседателска функција во Президиумот, Ченто многумина го нарекуваат и прв претседател на Македонија

Димитрија Чуповски е еден од најистакнатите афирматори на македонската национална мисла. Бил член и основач на неколку македонско научно-литературни друштва, повеќето од нив во Русија каде што подолг период дејствувал како деец и борец за македонската самобитност

Цар Самоил е основоположник на македонското средовековно царство. Познат е како еден од највоинствените ликови во македонската историја. Починал од срцев удар седејќи на тронот по веста за судбината на својата војска на која на секој стоти војник Византијците му извадиле по едно око

Гемиџиите биле таен македонски терористички кружок составен од повеќе млади Македонци, револуционери-анархисти. Повеќето од нив биле интелектуалци што доброволно се здружиле, формирајќи го кружокот, под влијание на Македонскиот таен револуционерен комитет

Јустинијан Први бил последниот император што успеал да ги обедини Источното и Западното Римско Царство. Историјата го памети и како најголем кодификатор на класичното римско право. Големината на овој цар е неразделно поврзана и со неговата длабока православна вера

Карпош бил водач на селското востание од Кривопаланечкиот и од Кумановскиот регион организирано против турските феудалци. Востанието било задушено, Карпош заробен, набиен на колец и избоден со копја по што Турците го фрлиле од Камени мост во Вардар

Споменикот на Неџат Аголи е планирано да се постави рамо до рамо со коњаникот на Гоце Делчев. Тој бил министер за здравство во македонската влада од 1945 година. Споменикот допрва треба да се лее во бронза. И тој, како и околните споменици, ќе достигне висина до пет метри