Претходен број

НЕКСТ ТАЈМ

Ние сме морални победници

„Презадоволни сме од нашиот настап! Дадовме се' од себе и примивме многу комплименти од колеги, учесници на ’Евросонг‘ во Москва. Во Македонија ќе се вратиме со крената глава“, ни изјави Мартин по завчерашниот телефонски разговор.

Конечниот пласман од првата полуфинална вечер значеше и крај за амбициите и надежите на македонските претставници, групата „Некст тајм“.

Со мотиви на руските сказни, како што се „Црвениот цвет“, „Магичниот коњ“, „Змејот“, и со помош на две девојчиња кои на сцената долетаа како птици, беше отворено 54. издание на Евровизија 2009 во Москва.

И покрај одличната изведба на сцената, конечниот исход беше неповолен за Македонија, како и за уште седум земји (Црна Гора, Чешка, Белгија, Белорусија, Андора, Швајцарија и Бугарија), кои отпаднаа во трката за најдобра европесна, која ќе се избира на 16 мај, заедно со земјите што ќе се пласираат во втората полуфинална вечер.

Среќа ги послужи Турција, Шведска, Израел, Португалија, Малта, Финска, Босна и Херцеговина, Ерменија, Романија и Исланд.

Публиката френетично ги бодреше своите претставници до самиот крај на изведбата, додека визуелните ефекти и грандиозната сцена беа надополнети со присуството на водителите Наталија Водјанова и Андреј Малахов.

За вечерва е планирано да се одржи и втората полуфинална вечер, на која ќе настапат: Хрватска со песната „Лијепа Тена“ во изведба на Игор Цукров и Андреја Шушњара, потоа Ирска со дуото Синид Мулви и Блек Дејзи, кои ќе ја изведат песната „El cetera“, Латвија со Интарс Бусулис која ќе ја пее песната „Пробка“, Србија со претставникот Марко Кон и Милан и темата „Ципела“, Полска со Лидија Копања и песната „I donе't wanna leave“, фаворитот Норвешка ќе го претставува Александар Рибак и композицијата „Fairytale“, Кипар ќе го претставува Кристина Метакса со „Firefly“, осми настапуваат претставниците на Словачка, дуото Камил Микулчик и Нела Поцискова со песната „Let to moon“, потоа следува Данска со Бринк и „Believe again“, Словенија со Квартисимо и Мартина кои ќе ја изведат композицијата „Love symphony“, Унгарија со Золи Адок и песната „Dance with me“, Азербејџан го претставуваат Асел и Араш со темата „Always“, Грција по втор пат ќе се претстави со Сакис Рувас и неговата композиција „This is our night“, Литванија ќе ја претставува Саша Сон со песната „Love“, Молдавија со Нели Кјобани и „Hora Din Moldova“, шеснаесетта настапува Албанија со претставничката Кејси Тола и песната „Carry me in your dreams“, Украина со Светлана Лобода и симпатичната „Be my valentine“, претпоследна е Естонија со групата „Урбан сим��они“ и песната „Randajad“ и Холандија со „Туперс“ и темата „Shine“.

Уцена

Претставниците на Холандија, спроти одржувањето на втората полуфинална вечер, изјавиле дека постои можност да го откажат своето учество на „Евросонг“ доколку не се одржи ветената парада на хомосексуалците, планирана за време на одржувањето на финалната вечер. Доколку се случи такво нешто, Холандија ќе биде трета земја што се откажала од Евровизија, по Сан Марино и Грузија.

Неразбирлив рок

Светските медиуми го споредија дуото „Некст тајм“ со популарната американска група „Џон Бон Џови“ и притоа констатираа дека рок-песните по правило би требало да се изведуваат на англиски јазик за да бидат поразбирливи за публиката.