Снегот ги збриша таксистите од улиците

Скопјани реагираат дека таксистите одбиваат да возат по снежни услови

Бојан Шашевски


Таксистите ги оставија скопјани да газат пеш по снегот. Возило по улиците нема ни за лек, а залудни се и упорните вртења на броевите на такси-компаниите. Лизгавите коловози, веројатно, не им се привлечни на таксистите, а нивните возила, со или без зимска опрема, по се' изгледа претпочитаат да ги користат на суво време. Вакви реакции доаѓаат од секојдневните, редовните муштерии на превозниците. Скопјани се жалат дека во четвртокот и петокот утрото, ниту една такси-компанија немала доволно возила за да одговори на потребите на граѓаните. Кон работа или училиште, и покрај врнежите од снег, се одело или пеш или со градски автобус. Ретки биле и такси-возилата кои можеа да се видат по улиците, кои и не застануваа на повиците на граѓаните.

„Речиси секојдневно користам такси за да го однесам детето на училиште. Сепак, мора да забележам дека секогаш кога има неповолни временски услови надвор, такси-возила нема. Ако заврне дожд или снег, ако подмрзнат улиците, таксистите си седат дома, а граѓаните треба да се снаоѓаат како знаат. Па се прашувам, кога мислат дека треба да работат, кога се шпиц часовите и кога поради метежот во сообраќајот не' дерат со цените или услугите треба да ги нудат секогаш кога им требаат на граѓаните“, револтиран е еден жител од општина Карпош.

Тој вели дека и во четвртокот и во петокот наутро барал услуга во неколку компании со кои најчесто се вози, но од сите бил одбиен. На крај одлучил, и по цена детето да задоцни на училиште, да го однесе пеш.

„Ѕвонев во ’Делукс’, во ’Рива’, во ’Вардар’, ’Лотус’, ’Наше такси’ и уште некоја компанија и, како и секогаш кога е надвор лошо времето, возило не ми пратија. Дека не можеме да се потпреме на услугата на такси-компаниите потврдува и еден случај кога имав потреба да договорам превоз до аеродром ноќе. Тогаш ми кажаа дека нема таква практика, да си се јавам ноќта, па ако има слободно возило ќе ми го пратат, ако не, да барам во друга компанија“, се жали скопјанката Марија Митева и прашува дали такси-компаниите имаат обврска во секое време од денот и ноќта да имаат свои возила по улиците или, пак, таксистите си возат кога сакаат и колку сакаат.

Од такси-компанијата „Рива“ велат дека постојано има таксисти по улиците. Тврдат дека сите се ангажирани во услови на снежна покривка.

„Граѓаните веројатно чекаат бидејќи, во моментот на повикот, сите 20-30 такси-возила од некој реон се зафатени. Како што владее криза со такси-превозот, и тоа како има работа за таксистите, особено во шпицовите во утринските часови и попладне околу 16 часот“, објаснуваат од управата на „Рива“. Оттаму велат дека нивните таксисти превезуваат патници буквално кога сакаат, немаат определено работното време и смени, а од компанијата ги ограничуваат и ги праќаат дома единствено кога ќе забележат дека возат предолго. Притоа, додаваат дека во зимски услови самите таксисти се задолжени да набавуваат синцири и посебни гуми за возилата.

Сличен одговор добивме и од такси-компанијата „Делукс“. Оттаму потврдуваат дека и нивните превозници немаат лимит во однос на работните часови. „Возат кога сакаат. Сами решаваат дали ќе останат дома или ќе работат“, велат од компанијата „Делукс“.