Брисел ќе ја повтори препораката за преговори

„Македонија е подготвена да стане членка на НАТО и да ги почне пристапните преговорите со ЕУ, но останува условот за името. Земјата треба да покаже иницијатива и да продолжи да ја презентира својата вистина пред меѓународната заедница и особено пред земјите-членки Унијата и на Алијансата, бидејќи тие сакаат да видат дека е конструктивна и оти сака решение. Ова го истакнува Матеј Марн, политички директор во Министерството за надворешни работи на Словенија. Тој очекува и годинава ЕУ да ја повтори препораката за почнување на преговорите во извештајот што ќе се објави на 10 ноември. „Сепак, политичката одлука ќе се базира на прогресот во спорот за името“, вели Марн.

За тоа дали ЕУ би се вклучила како олеснувач во решавањето на грчко-македонскиот спор како во случајот со Словенија и со Хрватска, смета дека тоа е можно, но двете страни мора да дојдат до некаков договор барем за нешто и да побараат помош од Брисел.

„Не можам да коментирам за македонската надворешна политика во контекст на името, но, гледано однадвор и со дистанца, се чини дека на Македонија и' недостига иницијатива. Зачестените средби на високо ниво меѓу македонски и грчки претставници и директните разговори создадоа големи очекувања кај меѓународната заедница, но за време на летото немаше никакви информации. Доколку има тајни разговори, тоа е добро, но ако ништо не се случува, тоа е повторно пропуштена можност“, истакнува Марн. (МИА)