Поглед

Збогум во здравството

Јасмина Јовановска

Дали оставката на вториот менаџер на Фондот за здравствено осигурување, Јанез Јелникар, значи уште една дамка за концептот двојно менаџирање во здравството? Ваквата дилема се наметнува особено што во внатрешноста на земјата Владата веќе ги укина вторите директори на здравствените установи. Официјално, објаснувањето беше за да се направат заштеди. Но, заминувањето на вториот фондовски директор во здравствените кругови се толкува како уште еден доказ за утнатото двојно директорување на здравствените установи.

Уште повеќе што неофицијални извори велат дека оставката на Јелникар му била изнудена откако уште пред два-три месеца Владата му се заблагодарила на неговата соработка. Но, се чекало натурализираниот Македонец да си најде место каде да се удоми по напуштање на директорската функција во Македонија. Во оставката на Јелникар официјалното објаснување е дека си заминува од семејни причини.

Од Фондот велат дека не се напушта концептот за втор директор и дека за неколку недели ќе биде распишан конкурс за втор директор, но со какви услови засега не се знае. На Владата, очигледно, тешко и' паѓа да си ја признае грешката со двојното директорување. А да не зборуваме колку тоа ја чини државата. Само менаџерскиот договор на Јелникар се зборува дека е околу 60.000 евра годишно.

Зарем, толку во нашата земја нема стручњаци, кои би работеле и за десеттина од платата на странскиот директор. А нашите стручњаци, можеби и нема да прават толку беља, како странците, кои пациентите ги чинат и пари и нерви. Домашните експерти, секако, повеќе ги знаат проблемите на сопствената земја од гостите. Па, сигурно нема да има игри околу квотите на аптеките колку државни лекови да набавуваат, а нема да има ни толку високи доплати за лекови.