Советот за евроинтеграции продолжи со работа
Националниот совет за евроинтеграции вчера ја одржа својата прва седница по изборите и по изборот на старо-новиот претседател на Советот од редовите на опозицијата, Радмила Шекеринска. На седницата посветена на реализација на мерките за постигнување на главните приоритети за пристапување во ЕУ, присуствуваа и амбасадорот на Франција, Бернар Валеро, и евроамбасадорот Ерван Фуере. Според Фуере, Советот и неговото функционирање покажуваат оти е можно интересите да се постават на натпартиско ниво и да се изразат националните интереси во поглед на евроинтегрирањето. Фуере пред Советот изјави дека не сака да се повторува со она што го кажа во петокот пред собраниската Комисија за европски прашања, но оти тоа би била добра платформа за дискусија.
Пред Советот се обрати и вицепремиерот задолжен за европски прашања, Ивица Боцевски, според кого од Советот треба да се испрати порака за консензус за прашањата на евроинтеграциите. Тој кратко елаборирајќи поединечно за осумте определници кои ЕУ и' ги достави на земјава за добивање датум за преговори, апелираше за сеопфатен дијалог што би се одвивал во рамките на Собранието, кое би им вдахнало живот на мерките за исполнување на критериумите. Тој порача Советот да понуди модалитети за исполнување на целите, кои ќе бидат разгледани и вреднувани.
Во своите обраќања дел од претставниците на партиите од опозицијата побараа од премиерот Никола Груевски и од Владата да се воздржат од изјавите за очекуван негативен извештај од Европската комисија, што во таков случај ја прават нецелисходна потребата од ваков совет.
Некои од нив и' порачаа на Владата дека прв чекор за решавање на проблемот со евроинтегрирањето е да се признае дека постои проблем и вистински да се лоцира одговорноста, а не за неуспесите на домашен план да ја обвинува опозицијата, а на надворешен план Грција. (Т.Г.) |
