Директниот дијалог без конкретни резултати
Од средбата меѓу Милошоски и Бакојани не можеше да се очекува многу, двајцата ги повторија истите позиции за името
Од нашиот дописник
Тони Гламчевски
Нанси - Директната средба во Париз меѓу шефовите на дипломатијата на Македонија и на Грција беше непродуктивна, но ако ништо повеќе, повторно е воспоставен дијалог на високо ниво. Од средбата меѓу Антонио Милошоски и Дора Бакојани не можеше да се очекува многу, двајцата ги повторија истите позиции во спорот за името. Средбата, која во почетокот се посакуваше да биде тајна, но набрзо стана позната за новинарите (повеќе по „вина“ на грчката страна, која ги повика телевизиските екипи во хотелот „Бристол“), траеше еден час. До оваа втора средба само за два дена во француската престолнина, како што рече и самиот Милошоски, дојде по негово барање и едно е јасно: разговорите за разликите околу името ќе останат под мандатот на ОН и медијаторот Метју Нимиц. Разговорите ќе траат се' додека не се изнајде прифатливо решение за двете страни. Средбата на министрите, како што рече Бакојани, не беше со цел тие да ги заменат преговарачите, туку заедно да разговараат, што покажува дека се отворени за дијалог.
Во изјавите за печатот, дадени веднаш по разговорите, тие беа квалификувани како искрени и отворени, со намера да се подобри климата во преговорите за името и дека тоа подобрување треба да се почувствува уште на следната преговарачка рунда.
„Верувам дека успеавме во оваа намера и мислам дека до следната средба на преговарачите ќе успееме да ја постигнеме целта - да ја подобриме климата“, рече Милошоски. Но, кога микрофоните и камерите не се вклучени, се слушна дека разговорите биле „тврди и на моменти напнати“. Самиот Милошоски пред новинарите призна дека не станува збор за лесно прашање и дека не може лесно да биде решено. Но, во интерес на двете земји, Македонија и Грција, е дијалогот да остане отворен.
Официјално се разменија мислења за позициите на двете влади, официјално двете влади немаат проблеми за да направат чекор напред и да се најдат поблиску до едно решение. Официјално во разговорите не се навлегло во деталите на преговорите за името, но неофицијално се разговарало за детали. Наводно, Бакојани предложила нацијата и јазикот да се викаат македонски, но напишано на латиница. Тоа веднаш било одбиено од македонската страна.
За разлика од Македонија, која мора да фати приклучок со евроатлантските интеграции, според Бакојани, на Грција не и' се брза да најде решение.
Согласноста во името да стои зборот Македонија е последниот компромис што го направила Атина и во иднина земјата не треба да очекува отстапки од едно име за сите употреби.
Милошоски, наводно, и' објаснил на грчката колешка дека за Македонија прашањето з�� името и евроатлантските аспирации се две различни теми, кои владата во Скопје не ги става во ист контекст.
Со други зборови, двете страни и понатаму стојат на своите позиции и, судејќи по тоа што беше речено, не е постигнат напредок, освен во подобрувањето на климата во затегнатите односи. Шефот на македонската дипломатија укажа пред печатот дека македонската Влада нема да отстапи од своите позиции за зачувување на македонскиот јазик, нација и идентитет. Додека неговата грчка колешка повтори дека Атина се залага за едно име во кое ќе ја има географската определница и кое ќе биде за сите употреби. „Грција дојде на овие преговори со добри намери одлучена да направи се' што може за да најде решение прифатливо за двете страни, во рамките на грчката позиција, односно едно име со географска определница за сите употреби“, рече Бакојани.
Прашани зошто преговараат кога двете страни остануваат на своите позиции, одговорот на Бакојани беше дека двете земји преговараат во рамките на ООН и целта е да се најде прифатливо решение за сите. Таа појасни дека во Њујорк на посредникот Нимиц ќе му бидат пренесени забелешките на владата од Атина околу неговиот последен пакет предлози. Според најавите на двајцата министри, не е исклучена можноста македонската и грчката делегација да се сретнат уште еднаш, на маргините на Генералното собрание на ОН, што започнува на 23 септември во Њујорк.
Според некои информации што се објавени во печатот, предвидено е на маргините на заседанието во Њујорк со медијаторот Нимиц одделно да се сретнат македонскиот претседател Бранко Црвенковски и шефицата на грчката дипломатија. Грчките медиуми во своите осврти посветени на средбата Бакојани-Милошоски не пропуштаат да нагласат дека меѓу македонската Влада и претседателот постојат несогласувања околу пристапот кон проблемот со името и дека македонската делегација заминува во Њујорк без усогласени ставови.
Од друга страна, според истите пишувања, се вели дека двете земји се под силен притисок на САД да се најде решение за името пред истекот на мандатот на Џорџ Буш. Во некои европски кругови се споменува дури и можноста за изнаоѓање решение уште оваа есен.
Така, пред средбата со Антонио Милошоски, грчката министерка за надворешни работи, Дора Бакојани, ја доби поддршката од својот француски колега Бернар Кушнер во однос на спорот за името со Македонија.
„Можам да речам дека ние ја поддржуваме Грција, бидејќи веќе го имаме кажано тоа. Но, исто така, сакаме проблемот да биде решен и тоа колку што е можно побрзо, бидејќи нема да останеме блокирани на БЈРМ, тоа и така трае веќе предолго. Се надевам дека во претстојните недели ќе најдеме решение за името“.
Францускиот министер за надворешни работи притоа, исто така, призна дека проблемот со името на Македонија е „заеднички проблем“, кој се однесува на целата Европска унија. |
