Претходен број

Груевски не гледа потреба пак да се среќава со Црвенковски за името

Немаше потреба од средба. Црвенковски знае кои се нашите ставови, а ние неговите, изјави Груевски

Тамара Грнчароска


Премиерот и претседателот на државава имаат различни ставови околу прашањето за името, но меѓусебно добро познати, поради што нема потреба од нивна повторна средба по последниот предлог за решение на медијаторот во спорот со Грција, Метју Нимиц.

Вака парафразирано гласеше вчерашниот одговор на премиерот Никола Груевски на прашањето зошто не се одржала средба на државниот врв по последниот пакет на Нимиц и пред заминувањето на Бранко Црвенковски на заседанието на Генералното собрание на ОН, во чии рамки тој треба да се сретне со посредникот во спорот. „Немаше потреба од повторна средба, бидејќи многупати досега сме ги повториле нашите позиции, така што сосема е јасно и Црвенковски точно знае кои се нашите ставови, а и ние неговите“, изјави Груевски.

За средбите во Њујорк на претседателот со Нимиц и со високи претставници на американската администрација, Груевски рече дека „ние сме во очекување што ќе разговара Црвенковски, а можеби и нешто ќе издејствува и ќе ни понуди како решение за проблемот со името, а со тоа и многу други поврзани прашања“. Според Груевски, и министерот за надворешни работи, Антонио Милошоски, и сите други во Њујорк ќе се обидат да дојдат до идеи со кои, како што нагласи, „можеби би го решиле или би го придвижиле процесот“.

За последниот предлог од Нимиц, Груевски ја изнесе позицијата дека „Владата има изградено став што сака од тие разговори независно кој каков предлог ќе даде. Нашиот став е изграден и нашите забелешки се во правец на приспособување на оној став што би сакале да го видиме ние“.

Инаку, оваа недела во Њујорк се одржува 63. седница на Генералното собрание на ОН, на кое ќе учествуваат претседателот Црвенковски, кој уште во петокот отпатува за САД, и министерот Милошоски, кој денеска треба да ја надополни македонската делегација.

Генералното собрание изминативе месеци беше неофицијалниот краен датум до кога е можно да се изнајде решение за името, по кој целиот процес би се одложил до идната година поради промената на администрацијата во Вашингтон, кој досега притискаше за итно решение на проблемот.

Во рамките на посетата беа најавени средби на македонската делегација со сите страни инволвирани во преговорите. Досега, како што јави Дојче веле, до Црвенковски не пристигнало барање за средба со министерката за надворешни работи на Грција, Дора Бакојани. Таа ја предводи грчката делегација во Њујорк, составена од 35 дипломати. Од Кабинетот на Црвенковски велат дека дури и да пристигне такво барање, тоа нема да биде прифатено поради различните политички нивоа. Според Дојче веле, повикувајќи се на извори блиски до претседателот, дополнителна причина да не се сретнат Црвенковски и Бакојани е изјавата на Нимиц, по последната рунда преговори во Њујорк, дека средби на повисоко ниво може дополнително да ја компликуваат и онака сложената ситуација во преговорите за името. (Т.Г.)