Претходен број

Заев им се извини на граѓаните за грешките на СДСМ

Лидерот на СДСМ, Зоран Заев, вчера јавно им се извини на граѓаните, како што рече, за грешките што ги направила партијата во минатото.

„Социјалдемократскиот сојуз во своите 17 години постоење има дадено голем придонес во развојот на Македонија. Но, исто така, мора да признаеме дека имаме направено доста грешки. Затоа, по повод овој голем христијански празник Мала Богородица, сакам јавно да им се извинам на граѓаните за сите наши грешки во минатото. Но, исто така, сакам да кажам дека во нашето идно работење, со свртена нова страница во вкупното дејствување, нема да дозволиме да ги плаќаме даноците од минатото“, рече Заев.

Лидерот на опозицијата и градоначалник на Струмица, поддржувајќи ја акцијата на Владата „За почиста европска Македонија“, вчера рече и дека СДСМ директно се вклучил во оваа акција, со што отвора нова страница во своето работење и сите добри работи на оваа власт во иднина ќе ги поздравува и безрезервно ќе ги поддржи.

„Но, исто така, сите лоши одлуки силно ќе ги критикуваме“, изјави Заев.

Во централата на СДСМ во Скопје вчера не беа достапни да го коментираат извинувањето на новиот лидер, но извори блиски до партискиот врв незадоволно коментираа дека потегот на Заев е погрешен и дека СДСМ има и заслуги за државата.

„Со таквиот настап Заев им оди на рака на нападите од ривалската ВМРО-ДПМНЕ, која го обвинува СДСМ за целата досегашна политика“, коментира висок партиски функционер .

ВМРО-ДПМНЕ го оцени извинувањето како „интересно и чудно“, соопшти портпаролот Александар Бичиклиски. „Граѓаните добро паметат кои политичари ги направиле тие грешки, бидејќи раководството на СДСМ е исто“, рече тој, именувајќи ги високите партиски функционери Радмила Шекеринска, Игор Ивановски, Владо Бучковски и други, заедно со претседателот Бранко Црвенковски. „На обичните луѓе изјавите на Заев не им значат ништо, бидејќи тие изгубија премногу години поради луѓето кои и денес раководат со СДСМ“, рече Бичиклиски. (Е.П.-С.К.)