Признавањето на Косово ќе почека?
Македонија се' уште не донела одлука за признавање на независноста на Косово и е во постојана комуникација со партнерите од ЕУ и од НАТО околу тоа прашање, „така што доколку има нешто ново, јавно ќе соопштам, но засега нема“, изјави вчера премиерот Никола Груевски како одговор на информациите кои минатата недела дојдоа од Грција дека нашата држава „деновиве“ ќе ја признае независноста на Косово. Владата го следи внимателно овој процес и постапува согласно со државните интереси на Македонија, е ставот на Груевски.
Вицепремиерот задолжен за европски прашања, Ивица Боцевски, вчера изјави дека во однос на прашањето за признавање на независноста на Косово нашата земја сериозно и претпазливо го следи развојот на настаните северно од земјата и секоја одлука што ќе ја преземе Македонија ќе се темели исклучиво на националните и државните интереси на македонскиот народ и на државата. (Н.Р.)
|
