Со свеќи за подобро утре на Атина

Атина - Илјадници свеќи го осветлија плоштадот Котција во центарот на Атина вечерта пред неделните избори. Целта на акцијата, која ја организираше граѓанското здружение „Атенистас“, беше поздравување на новиот ден и надежта за посветла иднина на градот што треба да дојде со избирање на новиот градоначалник. Палејќи по една свеќа околу илјада граѓани, кои го поддржаа настанот, истовремено го изразија својот револт поради незаинтересираноста на политичарите за мрачните делови на градот што тонат во криминал, трговија со наркотици и проституција. „Сите овие свеќи може да ги сфатите како надеж за градот, но и жалење за сите животи што се изгубени од дрога или од проституција“, изјави Јанис Ѕарас, уметник и еден од членовите на „Атенистас“. Ова здружение постои само два месеца, а досега имаат завршено неколку успешни акции како потсетување на возачите за неправилно паркирање, кое им пречи на граѓаните, преку закачување стикери на автомобили паркирани на недозволени места, чистење на одредени делови на градот, уредување на просторот во центарот на Атина и околу железничката станица, потоа засадување цвеќиња и фарбање на уличните жардиниери. Како што велат од „Атенистас“, за сите проекти сами одделуваат по најмногу две-три евра. (М.П.)