Затворен аеродромот „Александар Велики“

Скопскиот аеродром „Александар Велики“ од вчера попладне е затворен поради намалената видливост предизвикана од силните врнежи од снег. Одговорните од аеродромот информираа дека пистата е чиста и ги исполнува критериумите за безбедно слетување и полетување, но снегот ја намалува видливоста под дозволените граници. Од тие причини, авионот со патници од Прага, кој требаше да слета вчера околу 14,30 часот, беше пренасочен кон охридскиот аеродром „Св. Апостол Павле“, а авионот од Истанбул беше вратен. Уште од утрината беше одложен и летот на „Малев“ од Будимпешта. Со мало задоцнување вчера утрината се реализирале само полетувањата за Виена, Загреб и за Белград.

Патниците кои на скопскиот аеродром очекуваа заминување кон неколку дестинации, вчера останаа да чекаат во аеродромската зграда. Сите планирани полетувања попладнето кон Истанбул, Прага, Будимпешта, Љубљана, Загреб и Цирих беа одложени. Според најавите од Управата за хидрометеоролошки работи, снежните врнежи од денеска ќе се намалат, по што се очекува и нормализирање на работата на аеродромот. (С.Н.)