Хаос во Скопје, затаија општинските служби

Снегот го отежна сообраќајот и во Скопје, иако екипите на градската Зимска служба уште во раните утрински часови интервенираа на сообраќајниците. Специјализираните камиони кои беа активирани уште во четири часот наутро фрлија 190 тони сол. Со механизација се расчистуваше снегот на улиците и на булеварите, а приоритет имаа подвозниците, надвозниците, мостовите и високите зони кон Водно и Скопска Црна Гора. Градските автобуси имаа проблем да се искачат кон населбите Железарница, Пржино, Радишани... Возилата сообраќаа само до подолните села. На многу релации ретко се движеа автобуси, а граѓаните мрзнеа на постојките.

Неисчистени останаа сервисните и станбените улици, но и тротоарите, бидејќи поголем број од општинските служби затаија. Граѓаните тешко се движеа до постојките, продавниците, амбулантите.

Единствено, кризниот штаб на Општина Аеродром навремено реагираше и веднаш ги организираше сезонските работници за да го чистат снегот, при што беа фрлени 30 тони сол. (Сн.К. - Б.Ш.)