Заврши истрагата за убиството на докторката Угриновска

Со психијатриското вештачење на лекарот Михајло Ламбевски, предметот е комплетиран

Љубиша Станковиќ

Психијатриското вештачење на лекарот Михајло Ламбевски (62), осомничен за свирепото убиство на директорката на Заводот за рехабилитација, вчера пристигна во Кривичниот суд, со што се комплетираше вештачењето за смртта на докторката Лилјана Угриновска-Груевска.

Со дополнението на психијатриското вештачење, судот ја комплетираше истрагата, која веќе неколку месеци се води за осомничениот Ламбевски. Сега се очекува предметот да биде испратен до скопското Јавно обвинителство, кое ќе треба да поднесе обвинителен акт за докторот Михајло Ламбевски. Неодамна од Психијатриската клиника беа доставени вештиот наод и мислењето до судот, но судот побара негова доработка, бидејќи лекарите не одговориле на прашањата што ги побарал судот, а се однесуваа на здравствената состојба на осомничениот. Токму поради ова, судот побарал од Клиниката да се дополни вештачењето.

Во меѓувреме, судот уште еднаш му го продолжи притворот на осомничениот Ламбевски, каде што се наоѓа од денот на убиството, односно од 19 мај годинава.

Трагичниот настан во кој животот го загуби директорката на Заводот за рехабилитација во скопската населба Капиштец се случи во претпладневните часови кога во канцеларија на Лилјана Угриновска-Груевска, влегол нејзиниот колега со нож во рацете. Тој се нафрлил врз директорката, нанесувајќи и' дваесетина убоди во градниот кош, вратот и во стомакот.

Со тешки повреди и во коматозна состојба, директорката беше префрлена во Клиничкиот центар, но и по неколкучасовен обид, не успеаја да и' го спасат животот. Ламбевски беше приведен, а како можен мотив за убиството се споменуваа наводни недоразбирања што постоеле меѓу нив.