И Талер прати писмо до министрите на ЕУ

Атина притиска да нема рок кога повторно ќе се расправа за преговорите со Македонија

Слободанка Јовановска


И покрај разочараноста од политиката што ја води Владата, известувачот за Македонија во Европскиот парламент, Зоран Талер, упати писмо до сите министри за надворешни работи на земјите-членки на ЕУ и до шефицата на дипломатијата, Кетрин Ештон, барајќи на самитот во Брисел идната недела, конечно, да се донесе одлука за преговори со земјава.

Со тоа Талер му се придружи на министерот Антонио Милошоски, кој една недела претходно, исто така, испрати писма на истите адреси, па и на шефот на грчката дипломатија, Димитри Друцас, иако тој само технички го проследи. Во писмото Талер бара да нема уште одложувања на одлуката за преговори, бидејќи Македонија на неа чека пет години и е крајно време земјата да продолжи со процесот на приближување кон ЕУ.

„Искрено верувам дека продолжувањето на статус кво ситуацијата сериозно ќе ја стави во прашање стабилноста на земјата и на регионот, но и кредибилноста на ЕУ кон Западен Балкан“, порачува Талер. Ваквата одлука, според него, ќе ја охрабри Македонија да го реши спорот околу името, па ги повика Грција и другите земји-членки да покажат солидарност и одговорност.

Заклучокот за Македонија, кој треба да се најде во документите од самитот идната недела, требаше да се пегла вчера во Брисел, но, според извори од Европскиот совет, поради малата веројатност да биде усогласен е оставен за состанокот на министрите в понеделник. Според она што се дознава, Европската комисија ги притиска лидерите да донесат некаква полуодлука за препораката за преговори, односно политички да се изјаснат околу неа, а не само да ја повторат како минатата година.

Извори од Комисијата брифираа дека постои ризик заклучокот да биде отворен, или попрецизно безвременски, и на таков начин да се избегне потребата на следниот самит да се отвора ова прашање. Околу овој дел се најсилни грчките притисоци што бараат да отпадне делот од заклучокот дека за препораката треба да расправа следното претседателство со ЕУ. Атина, исто така, вршела притисок да се стави и оцената дека реформите во Македонија биле во застој годинава, како и да се спојат двата дела од минатогодишниот пасус за Македонија, со што ставот за името ќе се најде во ист контекст со главниот заклучок и индиректно - од политички став ќе стане формален услов.

Извори од Брисел оценуваат дека ЕК има интерес да почнат преговорите со Македонија, но поради блокадата околу спорот за името ќе си обезбеди и простор во заклучокот за отстапница од препораката, која веќе втора година не станува реалност. На прв поглед заклучокот веќе нема никакво политичко значење за Македонија, бидејќи ако не се донесе едногласна одлука за преговори (што не е реално), преговори и така ќе нема.

Интерес на Македонија е, сепак, препораката да се одржи во живот и да се најави кога следен пат ќе се расправа за неа, а не да биде ставена во заборав.