За САД, македонските ставови за името биле разумни

Македонија има разумни ставови и образложенија за македонскиот јазик и за именувањето на државјанството, но треба да попушти за некои прашања, како што е именувањето на аеродромот, наведува американскиот помошник-државен секретар за европски прашања, Филип Гордон, во документот од состанокот со високи претставници на ЕУ и на 27 земји-членки во Стокхолм на 3 јули 2009 година, што го објави „Викиликс“.

На состанокот на кој се расправало за Западен Балкан, Гордон оценил дека за време на шведското претседателство со ЕУ Македонија може да добие релативно позитивен извештај за напредокот кон Унијата, но, како што посочува, „без разлика дали е фер или нефер, можеби ќе мора да направи компромис за прашањето за името за да напредува во процесот на евроинтеграција“.

САД, вели американскиот дипломат, се' уште го оставаат медијаторот Метју Нимиц да го води процесот за решавање на името и укажува дека заменик-државниот секретар Џејмс Стaјнберг разговарал со грчката страна.

„Македонците треба да попуштат за прашања, како што е именувањето на аеродромот, тие имаат разумни ставови и образложенија за други прашања, како што се јазикот и именувањето на државјанството. Потребно е двете страни да попуштат за одредени прашања“, наведува Гордон во документот објавен од „Викиликс“.

Американскиот помошник-државен секретар на состанокот се заложил за поинтензивна соработка меѓу САД и ЕУ во однос на Балканот и за отворените прашања во регионот. (Н.Р.)