Ќе поевтинува водата во Битола

БИТОЛА - Управниот одбор на „Водовод“ во Битола одлучи цената на водата за домаќинствата да ја намали за 20 проценти откако од почетокот на годинава ја поскапе за речиси 120 проценти. Така наместо 30,25 денари колку што плаќаа битолчани во изминатите осум месеци за секој потрошен кубен метар вода, цената ќе се намали на 24,25 денари за кубик. Меѓутоа, поевтинувањето нема да биде и за претпријатијата, и натаму ќе плаќаат по 45 денари за кубен метар вода.

Од ЈП „Водовод“ како причина за корекција на цената на водата ја наведуваат намалената платежна моќ на граѓаните и сложената економска состојба на државата. Ваквата одлука на битолски „Водовод“ на 31 август треба да ја потврди и Советот на Општина Битола.

Предлогот не остана без реакции од опозицијата затоа што овие партии во битолскиот Совет лани остро се спротивставија на поскапувањето.

„Лани власта не' убедуваше дека водата во Битола поскапува во интерес на нашите деца, дека ако треба ќе ги загубат изборите, но водата мора да поскапе. Сега излегуваат со предлог за поевтинување. Но, да не се лажеме, ја поскапеа цели 117 проценти, а сега ќе ја намалат за само 20 отсто“, реагира Валентин Груевски, советник на ЛДП во Битола.

Опозицијата о��вини дека со предлогот што ги опфаќа само домаќинствата власта не покажува разбирање за тешката состојба во која се наоѓа стопанството. Од тука ЛДП прашува дали методологијата според која е пресметана цената на водата што ја платиле граѓаните во изминатите осум месеци, е законска. (А.Б.)