Штипска професорка обвинува за мобинг

Иван Бојаџиски

ШТИП - „Пет години го трпев мобингот од директорот на гимназијата во Штип, Ристе Петковски. Но, кога состојбата кулминира со отказно решение за мене, решив случајот да и' го дадам на увид на јавноста, за целата ситуација да го запознаам министерот за образование, а правдата да ја побарам на редовен с��д“. Вака се пожали Соња Шијаков, професорка по македонски јазик и литература во гимназијата „Славчо Стојменски“, која вчера на импровизирана прес-конференција пред споменикот на депортираните Евреи во центарот на Штип ги кажа своите маки. Професорката Шијаков го обвини својот директор Петковски дека наспроти зголемениот број часови по нејзиниот предмет, тој и' врачил отказ по дваесет години работен стаж во образованието.

„Отказот дојде во момент кога во гимназијата ‘Славчо Стојменски‘ имаме 44 слободни часа по македонски јазик и литература. Дваесет часа директорот и' дал на колешката, а другите часови ќе ги дал на оглас, односно ќе примел нови професори по мојот предмет. Директорот води хајка против мене, а зошто го прави тоа - не знам“, се чуди Шијаков.

Во отказното решение стои дека професорката добива отказ на договорот за вработување од ноември 2000 година, поради распоредување на испразнето работно место библиотекар. Во истото решение стои дека на оваа професорка и' се нуди склучување нов, променет договор за вработување на неопределено време со полно работно време на извршување работи и работни задачи библиотекар. Денешниот ден е последен за професорката да го потпише решението, а, во спротивно, таа ќе остане без работа.

Ристе Петковски, директор на штипската гимназија, вели дека професорката Шијаков намерно погрешно ја дезинформира јавноста дека добила отказ.

„Јас сум одговорен за тоа на најдобар можен начин да ја менаџирам работата на училиштето. Во таа смисла е и овој потег, со преместувањето на Шијаков од едно на друго работно место, согласно СО нејзините квалификации. Ја распоредив на упразнетото работно место библиотекар за кое се потребни образовни квалификации, кои професорката ги има. И на новото работно место нејзината плата останува иста, а таа ништо не губи од преместувањето. Мое легитимно право е да преземам потези за кои сметам дека се во ��нтерес на нашето училиште, кое со години е најдобро во општината. Не сакам ништо повеќе да кажувам за оваа професорка за да го заштитам нејзиниот дигнитет, а уште повеќе дигнитетот на училиштето“, истакна Петковски.

Шијаков пред новинарите појасни дека за мобингот од директорот пред четири години го информирала тогашниот министер за образование. „Министерот го препрати моето писмо до директорот по кое моите маки станаа уште поголеми“, појасни Шијаков, која не знае кои се причините за таквиот однос на директорот СПРЕМА неа.

Во недостиг од доволно информации за случајот на оваа професорка, од нејзини колеги дознаваме дека Шијаков не била омилена личност ниту меѓу персоналот ниту меѓу учениците. Имала чуден начин на комуникација со колегите, но и во оценувањето на учениците. За нејзината работа имало многу петиции од ученици и ОД родители. Таа, пак, тврди дека имала високи критериуми во оценувањето, дека не сакала да пишува петки на ученици што не заслужувале, ниту двојки и дека не подлегнувала под притисоци да им попушта на учениците што не ги заслужиле своите оценки.

„Кога еднаш и јас попуштив под таквите притисоци, резултатот се виде. При полагањето на матурските испити најголем број од учениците на кои им дадов одлични оценки едвај извадија двојки и тројки“, тврди Шијаков.

Во нашето образование последниве години се јавија многу случаи на отпуштања на професори и на наставници од политички причини. Во овој случај и двете страни тврдат дека во случајот со Шијаков нема политика. Расплетот се очекува од Основниот суд во Штип каде што професорката ги бара, како што вели, „своите нарушени права“.