„Еуросуперот БС-95“ поскап за половина денар

Малопродажната цена на „еуросуперот БС-95“ се зголемува за 0,50 денари за литар, цената на „еуросупер БС-98“ не се менува, а цените на дизел-горивата се намалуваат за еден денар, одлучи вчера Регулаторната комисија за енергетика. Според одлуката, се врши намалување на рафинериските и на малопродажните цени на нафтените деривати во просек за 1,65 отсто, односно за 1,26.

Новата цена на „еуросупер БС-95“ изнесува 68 денари за литар, а „еуросупер БС-98“ и натаму ќе се продава за 69,50 денари по литар. Новата цена на „еуродизел“ (Д-4В) ќе изнесува 56,50 денари за литар, а на екстра лесното масло за домаќинство (ЕЛ-1) - 45,50.

Со одлуката, за 0,855 денари за килограм се намалува и малопродажната цена на мазутот М-1 НС, кој сега ќе се продава за 30,745 денари за килограм.

Како причина за промената на цените на нафтените деривати се посочуваат за 0,34 отсто повисоката просечна цена на сурова нафта и за 2,05 отсто понискиот курс на денарот во однос на доларот, во изминатите 14 дена. (МИА)