Проработеа клештите за неплаќачите на струја

ЕВН со масовна акција за исклучување, дневно се кинат по 2.000 корисници

Маја Томиќ

„ЕВН Македонија“ започна со акција за масовни исклучувања за да ги дисциплинира и потсети неплаќачите навреме да си ги плаќаат сметките. Како што дознаваме, се исклучуваат и по 2.000 корисници дневно низ целата земја. Приоритет за исклучување имале оние што доцнеле со плаќањето по неколку месеци од оваа година, но ножиците проработеле и за останатите што ги исполнувале условите за тоа. Според ЕВН, овие акции не се невообичаени, а компанијата секогаш прво ги користи законските можности за да ги наплати побарувањата за потрошената струја. Инаку, овие акции се изразени токму пред зимскиот период кога сумите на сметките стануваат драстично повисоки, па од ЕВН препорачуваат граѓаните да ги плаќаат и тековните и заостанатите сметки за да не се доведат во несакана ситуација, без струја.

Очигледно, добро замислената кампања на ЕВН, која тече од август годинава, за наплата на долговите за струја на рати, зависно од висината на долгот, или во целост без камата, не ги даде очекуваните ефекти на компанијата. На самиот старт, во август, имаше засилен интерес кај граѓаните за плаќање на струјата на рати, поради што ЕВН и го пролонгира крајниот рок за еден месец, или до 1 ноември. Сепак, на само пет дена пред истекот на рокот, се склучиле само 6.000 договори, што е многу малку во споредба со реалните должници, поради што ЕВН се определи за масовни исклучувања.

Граѓаните се со поделени мислења околу сечењето на струјата. Едни велат дека секој оној што не плаќа треба да биде исклучен, затоа што во спротивно се дискриминираат редовните плаќачи. Други, пак, се жалат дека немаат пари за да си ги намират животните трошоци и дека ЕВН треба да има разбирање за нивната социјална состојба. Од ЕВН, пак, се правдаат дека и тие ја купуваат струјата од државата и имаат обврска редовно да си ги плаќаат трошоците за тоа. Додаваат дека на броилото се читаат само потрошените киловат-часови, но не и тоа дали корисникот е социјален случај или не е, потенцирајќи дека тоа прашање треба да се регулира преку државните институции.

Инаку „ЕВН Македонија“ во изминатите три месеци им понуди на сите должници да си ги намират неплатените сметки од последната година, на рати или одеднаш, без наплата на камата. Од ЕВН предупредуваат дека сите оние кои деновиве ќе бидат исклучени, по истекот на кампањата, на 1 ноември, нема да имаат можност да ги намируваат заостанатите сметки на рати или без камата.

Покрај кампањата за актуелните долгови од последните 12 месеци, ЕВН заедно со ЕЛЕМ им нуди на граѓаните и бенефиции за плаќање на тужените сметки стари и по неколку години. Интересот за тужените долгови бил поголем, како што дознаваме, особено поради тоа што се отпишува каматата за задоцнето плаќање која понекогаш е и повисока од самиот долг. За само две недели склучени се над 2.000 спогодби за тужен долг.