Да се одбегне двојното оданочување

Земјите што се најголеми трговски партнери на Македонија немаат склучено договори за одбегнување на двојното оданочување. Од Стопанската комора на Македонија побараа Владата да работи на склучување повеќе вакви спогодби, за да се олесни тргувањето, да се зголеми извозот и да влезат странски инвестиции. Но, додека се воспостават такви договори, од Комората предлагаат да се користат конвенциите што ги има потпишано поранешна СФРЈ, што е дозволено со Уставот на Македонија.

„Договорите за слободна трговија за одбегнување на двојното оданочување за заштита на инвестиции, царинска и соработка на другите инспекциски органи во граничните процедури, заемното признавање на сертификатите за квалитет и техничките стандарди, сертификати за потекло, заемно признавање на судските одлуки и соработка на судските органи, меѓусебно признавање на возачки дозволи и дипломи за образование, како и либерализираните визни процедури се предуслови за економски раст со зголемување на извозот и привлекување на странски инвестиции“, рече Љубица Нури, СКМ.

Според анализите на Комората, еден од главните приоритети е и либерализација на трговијата со Руската Федерација. На врвот на приоритетите се и Грција, Косово, Белгија, САД и членките на ЕУ, потоа потписничките на Централноевропската иницијатива за слободна трговија, но и земјите од Блискиот Исток. Инаку Македонија во првата половина од годинава тргувала со 171 земја. Остварила извоз во

вредност од 1,73 милијарди долари. Лани тој бил 1,45 милијарди, а во 2008 година 2,48 милијарди

долари. (Ек.Р.)