Националната банка на Грција го зголеми капиталот

Националната банка на Грција овој месец го зголеми акционерскиот капитал за 1,8 милијарди евра преку продажба на хартии од вредност на своите постојни акционери на финансиските пазари. „Планот за зголемување на капиталот донесен од Управниот одбор на банката беше реализиран со голем успех затоа што на првата понуда банката забележа 1,83 пати поголем интерес за хартиите од вредност од планираниот, односно беа побарани акции во вредност од 3,3 милијарди евра наспроти првично понудените 1,8 милијарди евра. Со зголемувањето на акционерскиот капиталот, НБГ се искачи на петтото место во Европа според стапката на адекватност на капиталот. Во согласност со планот за зголемување на капиталот, втората фаза која треба да следи дополнително ќе влијае позитивно на стапката на адекватност на капиталот, со што НБГ ќе го заземе лидерското место меѓу европските банки според стабилноста и капиталната сила“, се вели во соопштението на НБГ што го пренесува Стопанска банка како дел од групацијата НБГ. Според Стопанска банка, овој потег докажува дека заедно со матичната банка се обврзани да продолжат дејствуваат во насока на развој на економијата. (Ек.Р.)