Грција ја спасуваат 80 милијарди евра

Претседателот на германската Бундесбанк, Аксел Вебер, го изјавил ова пред мала група германски пратеници

За да биде спасена од банкрот на Грција можеби и' се потребни дури 80 милијарди евра. Претседателот на германската Бундесбанк, Аксел Вебер, изјавил дека Грција може да има потреба од 80 милијарди евра финансиска помош за да се справи со кризата, пренесува американскиот весник „Волстрит џурнал“.

Вебер го дал овој коментар пред мала група германски пратеници на состанок зад затворени врати, а информацијата ја пренел анонимен извор. Според изворот, состојбата во Грција се влошува и бројките постојано се менуваат.

Министрите на земјите од еврозоната и' предложија на оваа балканска земја, западната во долгови, заеми до 30 милијарди евра оваа година, со камата од околу пет отсто, доколку Грција има потреба од тоа.

Меѓународниот монетарен фонд, пак, може да одвои 10 или 15 милијарди евра итни заеми годинава. Според официјални лица, повеќе заеми може да бидат ставени на располагање следната година и во 2012 година, пренесува „Волстрит џурнал“.

Во меѓувреме, „Дејли телеграф“ коментираше дека грчкиот премиер Јоргос Папандреу „игра покер“ со Европската унија, одложувајќи го активирањето на пакетот финансиска помош за земјата, што веќе го одобрија ЕУ и ММФ за санација на огромниот внатрешен долг на Грција. Тоа, според лондонскиот весник, предизвикува сомневање во Брисел околу вистинските намери на грчкиот премиер, па се претпоставува дека со одолговлекувањето Атина само настојува да се избори за подобри услови за земјата во натамошниот тек на преговорите. Самиот Папандреу објави дека во следните неколку седмици ќе се одлучи дали да се активира механизмот на масивната финансиска помош од странство, инсистирајќи дека одлуката ќе зависи од процената дали е тоа во најдобар интерес за Грција. Неопределената позиција на грчкиот премиер сугерира дека Владата во Атина, место да го прифати одобрениот пакет помош тежок 45 милијарди долари, би можела да се определи за репрограмирање на својот долг, констатира „Дејли телеграф“.

Лондонските медиуми јавуваат и дека проблемите во европскиот воздушен сообраќај, што ги предизвика вулканскиот облак од Исланд, го одложи планираниот „важен состанок“ во грчкиот главен град, меѓу тамошната влада и високи претставници на ЕУ и на ММФ, за детализирање на финансиската помош. Тоа може да му даде повеќе време за размислување на Папандреу, но ја зголеми неизвесноста на меѓународните финансиски пазари за конкретните облици помош за грчката економија.

И самиот Папандреу се огласи околу тоа кои биле причините за грчката криза. Според него, таа се должи на недостигот од транспарентност, како и поради корупцијата и несоодветното трошење средства од даноците што ги плаќаат Грците. „Тоа се однесува, пред се', на начинот на функционирање на државата, па до недостигот од почит спрема државата од страна на индустриските здруженија, групите на интереси, а честопати и на граѓаните кон самите институции во државата и несоодветниот однос кон правилата за етика“, додаде Папандреу. Сето тоа се совпаднало во даден момент со високото ниво на буџетскиот дефицит во државата што, според него, е производ на сомнителни дејства.

Еден ден претходно грчкиот премиер изјави дека доколку е неопходно Атина без двоумење ќе прибегне кон механизми на отпуштање финансиска помош од ЕУ и од ММФ. „Доколку интересот на земјата наложува да го искористиме мехамизмот на поддршка, тоа ќе го направиме без колебање и ќе ги информираме граѓаните за секоја наша одлука. Ние не бегаме, туку ја преземаме својата одговорност“, се наведува во изјавата на Папандреу, објавена од неговата прес-служба.