Пролетните средби на ММФ и на СБ под прашалник

Средбите може да бидат одложени додека не се стабилизира состојбата со авиосообраќајот

Александрија Стевковска

Викендов министерот за финансии Зоран Ставрески би требало да учествува на пролетните средби на Меѓународниот монетарен фонд и на Светска банка. За време на престојот во САД се очекува Ставрески да оствари повеќе средби со високи претставници на меѓународните финансиски институции.

Но, сите овие активности ќе се реализираат доколку владината делегација отпатува за Вашингтон, што е ставено под прашалник, со оглед на актуелната ситуација со блокирање на воздушниот сообраќај, поради вулканската пепел во воздухот што се движела кон Америка.

Се најавува и можност пролетните средби на ММФ и на СБ да бидат одложени, додека состојбата со авиосообраќајот не се стабилизира.

Доколку, сепак, викендов пролетните средби се остварат, тие

ќе доживеат своевиден континуитет и на домашен терен идната седмица, со оглед на тоа дека тогаш се очекува тимот на ММФ да ја посети земјава, за уште еднаш да направи ревизија на економските параметри и да согледа дали Владата ја држи економија на правилен курс, како и дали нејзините прогнози за раст, дефицит и останати движења се остварливи.

Засега од канцеларијата на ММФ во Скопје потврдуваат само дека тимот на фондот се очекува идната седмица, но велат и дека точно утврдени средби со надлежните во земјава се' уште нема.

Сите овие активности се прават во време кога економиите се' уште ги чувствуваат последиците од кризата и кога во сите буџети се јавува дупка поради послабиот прилив на приходи.

Овој проблем нашата Влада го решава со внатрешно задолжување преку аукциите на државни записи, а најави и дека во втората половина на годината земјава ќе се задолжи и надворешно преку издавање нова еврообврзница, бидејќи парите од неа ќе може слободно да се трошат. Аранжманот со ММФ, како варијанта за поевтино задолжување, Владата во континуитет го отфрла, бидејќи тоа налага критериуми за трошења што таа не сака да ги применува. Воедно, тоа би значело признание дека економијата ни е во тешка состојба.

Експертите коментираат дека сега воопшто не станува збор за склучување на аранжман со ММФ, штом тоа не беше направено минатата година, кога кризата беше во полн ек.

Во очекување на новите прогнози за раст на глобалните економии, што треба да бидат презентирани денеска, вчера ММФ објави само куса најава за зголемување на прогнозата за раст на глобалните економии.

Како причина за зголемената прогноза се наведува брзиот раст на е��ономијата на Кина, која и натаму го следи позитивниот тренд.

„Јужна Америка и Африка двојно побрзо закрепнуваат од кризата, за разлика од САД, Јапонија и од Европа“, велат од ММФ.

Во препораките на ММФ се вели дека Кина наскоро ќе треба да ја смени монетарната политика, бидејќи вредноста на јуанот е премногу ниска и оти таквото движење е во корист на Кина.

Во јануарските прогнози на ММФ се велеше дека светската економија годинава ќе нарасне за 3,9 отсто. За следната година се прогнозира растот да биде забрзан на 4,3 отсто.