И летово на одмор со скап зелен картон?

Министерството за финансии никако да пресече и да ја намали цената на зелениот картон на 10 евра за сите

Соња Маџовска

Зелениот картон ќе чини само 10 евра како во најголемиот дел од другите држави, но никој не знае да каже кога конкретно ќе се случи тоа. Министерството за финансии, иако покажа волја да ја намали цената на зелениот картон и уште од минатото лето прави анализи за тоа, во меѓувреме како да се издиша со намалувањето на акцизите и на царината, па сега тактизира околу цената на зелениот картон.

Можеби ќе беше најдобро наместо да се одолговлекува со ова прашање, за да се одоброволат осигурителните компании, Министерството за финансии заедно со падот на акцизите и со зголемувањето на старосната граница за увоз на половни автомобили, во пакет да ја намалеше и цената на зелениот картон на 10 евра за сите.

Осигурителниот бизнис не е единствен за ова прашање, на едни им одговара да се намали цената, други се против. „Се' е математика. А во врска со цената на зелениот картон немаме ништо ново да кажеме“, велат од Националното биро за осигурување.

Според размислувањата на некои осигурителни компании, треба да се спојат зелениот картон и премијата за автоодговорност. Една од опциите е граѓаните при осигурување на автомобилот да платат, на пример, уште плус 10 евра, без разлика дали тие ќе патуваат или не во странство. Осигурителните компании не попуштаат за премијата за транспортерите. Тие остануваат на ставот дека за транспортерите премијата треба да остане висока, бидејќи исплатата на штетите за нив е најголема. Според нив, последниве три години од осигурувањето на товарните возила загубите постојано им се зголемуваат. Транспортерите, пак, упорно бараат да нема двојно осигурување.

„Осигурителните компании кај нас се заштитени како мечки. Само во Македонија се плаќа двојно осигурување. Транспортерите плаќаат 36.000 денари за осигурување од автоодговорност и 27.000 денари за зелен картон, плус 10.000 денари за приколка. Наша заложба е овие две осигурувања да се спојат, со што ќе се намали цената. Но, засега нема ништо ново. По толку увезени возила, во април, мислам дека треба Министерството за финансии да донесе одлука за намалување на цената на зелениот картон“, вели Билјана Муратовска од „Макамтранс“.

Инаку, пред секој празник, особено поради приближувањето на годишните одмори, се' позачестени се прашањата на граѓаните што да прават и каков зелен картон да набават. За нив сегашната цена за зелениот картон е превисока. Кај нас за еден месец тој чини 2.450 денари, за три месеци се плаќа 3.670, за половина година 5.500, а за една година 9.760 денари.

Граѓаните сметаат дека токму поради намалувањето на акцизите се отвора простор да се намали и цената на зелениот картон. Се' повеќе во јавноста се шпекулира дека мерката за увоз на половни возила ќе ја отвори и вратата за да се намалат трошоците на граѓаните што ги даваат за регистрација, за зелен картон и за осигурување. Ова е поттикнато и од очекувањата дека во земјава ќе се пререгистрираат и голем број возила со странски регистарски таблички.