Се отвора пат за поголем број фирми во погребалната дејност
Советот на Скопје започна постапка за усогласување на погребалната дејност со новиот Закон
Сања Наумовска
Советот на Скопје не ја укина одлуката за градски гробишта од 1984 година, туку го продолжи нејзиното траење се' додека не се лиценцираат и започнат со работа управителот и операторите на градските гробишта во Бутел, Камник и во Ѓорче Петров. Новата поставеност на управата и оперативното функционирање во оваа дејност се предвидени со Законот за гробишта, кој е донесен веќе една година и кој требало да почне да се применува уште пред 6 месеци.
Како што предвидуваат новите законски одредби, управителот и операторите во погребната дејност ќе треба да добијат лиценци од Министерството за транспорт. Со тоа ќе се оневозможи севкупната погребна дејност да ја врши еден субјект, како што беше случај со АД „Бутел“ досега. Законот дава можност за поделба на организацијата на погребот, на продажбата на погребна опрема, изработката на споменици и другите дејности да ги вршат различни субјекти, кои врз основа на условите што ќе треба да ги исполнат ќе добиваат лиценци. Улогата на локалната самоуправа, според Законот, ќе биде во давањето дозвола на лиценцираните оператори да работат на градските гробишта.
Иако неколкумина советници вчера изразија сомневања дека укинувањето на одлуката ќе значи правен вакуум, како и внесување хаос во погребната дејност, за градоначалникот Коце Трајановски тоа е прв чекор во средувањето на овој сериозен проблем. Трајановски не прецизираше дали новиот начин на работа ќе доведе до создавање на јавно претпријатие за погребални работи, но истакна дека укинувањето на монополот не значи и уништување на АД „Бутел“. Претпријатието ќе има можност да аплицира за лиценца во Министерството и да продолжи да ја врши својата работа според законските прописи.
„Решени сме да ставиме крај на еден проблем, кој постои веќе 20 години. АД ’Бутел‘ функционира без никаков контакт или контрола од Градот. Сега градската администрација има задача да работи на решавањето на сите проблеми поврзани со обезбедувањето нови локации за гробишта и со управувањето, со цел да се овозможи, ако не најдобро, барем нормално функционирање на гробиштата“, истакна Трајановски и информираше дека е можно градските гробишта да добијат и крематориум, со кој делумно ќе се реши проблемот со новите локации за гробни места. |
