Перипетии на судењето за убиството на туристот

Судот ги затвори, па ги отвори вратите за јавноста. Обвинетите тврдат дека се обидувале да ја раздвојат тепачка

Во тензична атмосфера и со многу нервоза вчера во Охрид започна судењето за убиството на српскиот турист Дејан Новаковиќ (34), извршено кон крајот на август минатата година. Во Основниот суд во Охрид за убиство им се суди на Митре Костоски и на Илче Јоноски, додека Ѓоко Наумовски е обвинет за помагање. Недостапен за судот е српскиот државјанин Драган Ѓорѓевиќ, обвинет за убиство.

Тензиите се подигнаа уште во почетокот на судењето кога судијката Милка Танеска одлучи процесот место во големата сала, да се одвива во малата сала, каде што им беше дозволен влез само на тројцата обвинети и на мајката, сопругата и братот на Новаковиќ, кои допатуваа во Белград. Тоа предизвика револт кај роднините на обвинетите охриѓани, како и кај многубројните новинарски екипи, кои иако со уредни дозволи останаа надвор од судницата. Се дознава дека претседателот на охридскиот суд, Владо Дејаноски, се обидувал да интервенира кај судијката да го прекине судењето во малата сала, а откако не успеал во намерата, бил принуден да се пожали кај претседателката на Судскиот совет.

По првата пауза, судијката Танеска им дозволи на новинарите да го следат судењето. Следуваше распит на обвинетите, кој траеше и во попладневните часови. Според нив, кобната вечер дошло до тепачка меѓу две групи српски туристи, а тие само се обидувале да ја смират ситуацијата и да ги раздвојат разбеснатите групи.

Новаковиќ беше претепан до смрт на 27 август минатата година. Неговата мајка пред доаѓањето во Македонија им изјави на српските медиуми дека едвај чекала да почне судењето.

„Само да им погледнам в очи тие луѓе. Кога ќе бидат завршните зборови, ќе ги поведам и двете внучиња за светот да види што остави мојот Дејан и кој сега ќе се грижи за нив“, изјави Јулијана Зубовиќ.

За тепачката, која заврши со трагедија, кружат разни верзии што се движат од тоа дека станувало збор за договорена тепачка меѓу две групи српски туристи, оти Македонци се пресметувале со Срби, а се зборува и дека Новаковиќ и неговиот другар од Србија настрадале ни криви ни должни откако се нашле на погрешно место во погрешно време. Која била вистината - ќе утврди судот. Првично, за убиството беа осомничени осум лица. (Г.А.)