Просветните инспектори откриле хаос во образованието во Струмичко

СТРУМИЦА - Состојбата со образованието во Струмица е загрижувачка, констатирал Државниот просветен инспекторат по извршениот инспекциски надзор во 12 основни и средни училишта во Струмица, Босилово и Василево.

Прекин на наставата за време на штрајкот, неадекватно оценување на учениците, неажурна педагошка евиденција, незаконско објавување огласи за прием на наставници и директори само во еден дневен весник, паралелки со помал број ученици за кои не била побарана согласност од Министерството за образование, непостоење програма за развој и систематизација на работните места... Ова се само дел од неправилностите од кои на вчерашната прес-конференција во Струмица ги презентираше директорот на Државниот просветен инспекторат, Роберт Георгиевски. Тој рече дека во училиштата била извршена инспекција на 12 декември по одржаниот отворен ден со министерот за образование и по бројните претставки од граѓаните на Струмица кои стасале до Министерството за образование.

„При извршениот инспекциски надзор беа констатирани огромен број неправилности кои даваат една загрижувачка слика за образованието во општина Струмица. Со оглед на неправилностите што беа констатирани при надзорот, донесени се 12 решенија со кои се наредени мерки кои директорите треба да ги преземат во законски предвидениот рок, со цел констатираната состојба да се надмине“, рече Георгиевски. Врз основа на откриените пропусти во работењето на струмичките основни и средни училишта, од Државниот просветен инспекторат до Јавното обвинителство биле поднесени пет барања за поведување прекршочни постапки. Директорот Георгиевски изјави дека од основачот ќе биде побарано разрешување на директорите на училиштата кои во законски утврдениот рок нема да ги отстранат констатираните неправилности. Вчера реагираа и од Општина Струмица. Изненадени се и лути што за наодите на Државниот просветен инспекторат дознаваат од медиумите, а не од инспекциските органи. Според Зоран Узунов, општински просветен инспектор, состојбата со образованието во Струмичкиот регион не била таква каква што се обидува да ја прикаже Државниот просветен инспекторат. (Е.П.)