Распределени парите од концертот за Тоше

Хуманитарниот фонд од речиси 10 милиони денари собрани од концертот „Те сакаме сите“, посветен на Тоше, што се одржа на 5 октомври, ќе биде поделен на неколку хумани цели. Ова вчера го соопшти Меѓународната фондација „Тоше Проески“, од каде што посочуваат дека средствата од хуманитарниот фонд, кој изнесува 9.544.937 денари, ќе бидат наменски доделени за помош на здравствени институции за деца и организации кои работат со деца и лица со хендикеп.

Ваквата одлука е донесена од страна на Управниот одбор на Меѓународната фондација, а во согласност со желбите и начелата на Тоше - да се помогне на повеќе места и да се донесе радост за повеќе деца. Најголемата донација, според одлуката на УО на Фондацијата, ќе биде доделена на 25 јануари 2009 со што ќе биде одбележан роденденот на Тоше. (Макфакс)