Протест на ЗНМ за грчката брана за македонските новинари
Здружението на новинарите на Македонија најостро протестира до Грција и нејзините одговорни институции за спречувањето на македонските новинари слободно да патуваат и да известуваат од нивната земја. Новинарите викендов не се пуштени да известуваат од настан во Грција и притоа биле претресувани.
„Никакво оправдување не може да биде тоа што на новинарите им е дозволено да влезат приватно во Грција, откако ќе ја остават опремата. Колепката на демократијата не смее да се плаши од информирањето и да дозволи само строго контролирани и проверени информации, или поточно информации кои се само по волја на властите во Грција. Грчките новинари секогаш во голем број и слободно можеле да присуствуваат на кој било настан во Македонија. Тоа што викендов се случи на македонско - грчката граница не смее да се повтори, посебно во ова чувствително време за односите помеѓу двете држави. Слободата на протокот на информациите помеѓу двете земји мора да постои, се' друго говори за едно поинакво време и создава многу лоша слика за демократијата и слободата на информирање во една држава“, се вели во писмото од ЗНМ испратено до Канцеларијата за врски на Грција во Македонија, Мисијата на Европската унија во Македонија, Меѓународната федерација на новинарите и медиумите во државава.
И додека одговорните од Канцеларијата за врски на Република Грција во Скопје правеле напори новинарите да можат да влезат во Грција, пред се' затоа што поседувале уредни визи за влез, одговорните на граничните премини барале дополнителни потврди од грчкото Министерство за односи со јавност, што досега не било практика.
Нашата загриженост, велат од Здружението на новинари, е уште поголема, затоа што ова се случува веќе вторпат. Пред две години екипа на А1, исто така, не беше пуштена да направи репортажа од Северна Грција, што говори дека оваа европска држава ги спречува новинарите на соседот да информираат слободно.
Од ЗНМ бараат од Грција и нејзините авторитети да ја спречат оваа практика на селектирање на настани кои можат да бидат следени од страна на македонските новинари, се во интере�� на слободата на информирањето. (П.Р.) |
