Дијаспората лобира за Македонија
Македонската дијаспора побара сугестии од претседателот Бранко Црвенковски како да продолжи со лобирањето во врска со името и привлекувањето странски инвестиции.
За ова, како што е соопштено, било разговарано вчера на средба на претседателот Црвенковски со висока делегација на Обединетата македонска дијаспора (ОМД), организација со седишта во највлијателните политичко-економски центри во САД, Канада и Австралија.
Делегацијата на ОМД го информирала претседателот Црвенковски дека нивното лобирање во овој период особено е насочено кон афирмација на македонските ставови за решавање на разликите со Грција околу името.
За таа цел, ОМД само во американскиот Конгрес има остварено контакти во повеќе од 150 канцеларии, при што на конгресмените им ја презентирала вистината за македонскиот национален идентитет.
Претседателот Црвенковски посочи дека припадноста на нацијата е неменлива и трајна, и оти ОМД со своите активности на најдобар начин го потврдува тоа, соопшти неговиот кабинет. (Макфакс) |
