Петрески: Иницијативата на Антикорупциска е неаргументирана
Охрид
ОХРИД - Поведувањето иницијатива за поднесување кривична пријава против градоначалникот на Општина Охрид, од страна на Антикорупциската комисија, е неаргументиран чин кој има нејасни мотиви. Ова вчера на прес-конференција во Охрид го истакна охридскиот градоначалник Александар Петрески.
„Објавените забелешки заради кои се препорачува кривично гонење на градоначалникот, целосно се неосновани и освен нарушување на имиџот на општината не постои друга издржана логика“, рече Петрески.
Тој побара јавно извинување од претседателката на Антикорупциската комисија и најави дека општината ќе ангажира адвокат и ќе ги преземе сите мерки за да го заштити угледот на градот.
„Државната комисија за спречување на корупцијата досега нема побарано извештај за спроведените препораки по извештаите од страна на ревизорот. Доколку се обратеше до општинските служби, тие ќе беа доставени, бидејќи за четирите точки кои се наведени во извештајот на Државната комисија за спречување на корупција целосно се спроведени“, рече Петрески.
Тој посочи дека поставувањето координатор за јавни набавки и донесувањето на интерен акт за регулирање на ставката за јавни набавки не се законски обврски, додека за неспроведување на обврските за донесување план и регистар за јавни набавки е предвидена прекршочна казна до 50.000 денари, но не и кривична одговорност. „Ова е доказ дека Антикорупциската комисија работи тенденциозно и неаргументирано“, рече Петрески. (Макфакс) |
