Анџелина Џоли

Забрана за снимање во Босна

Министерот за култура и спорт на федерацијата Босна и Херцеговина ја поништи дозволата за снимањето на филмот на Анџелина Џоли во Сараево. Филмот, кој е пријавен во Министерството под работниот наслов „Обединета љубовна приказна“, очигледно ги нема сите потребни документи и заедно со него не е приложено потребното сценарио, што не е во согласност со законот.

„Уште вчера повторно ги приложивме сите документи. Практиката зборува дека дозволата за снимање се издава врз основа на сценариото како што првично му го предадовме на Министерството. Пред еден месец, од истото тоа Министерство добивме дозвола без никакви проблеми“, изјавил Един Шаркиќ од продуцентнската куќа „Скаут филм“ од Сараево, која работи на филмот на Џоли. Локалниот министер за култура Гаврило Граховац не знаел дека филмот добил дозвола, а одлуката ја донел по состанокот со претседателката и член на здружението „Жени - жртви на војната“, кои тврдат дека филмот се базира на приказна за љубовта на една силувана жена и нејзиниот силувач. „Тоа не е точно. Никој од нив го нема прочитано сценариото. Филмот на Џоли не е заснован на таква приказна, ниту е жена што би работела на такво нешто и намерно би повредила некого“, додаде Шаркиќ. Инаку, на Анџелина Џоли, која во Будимпешта го снима своето режисерско првенче, на сетот и' се придружи и Бред Пит, а многубројните папараци, кои со денови ја опседнуваат Унгарија, го фотографираа како со сопругата ја разгледува локацијата и разговара со членовите од екипата на филмот. Тој пристигна во Будимпешта со близнаците Нокс и Вивиен минатата сабота, а завчера првпат и' се придружи на снимањето. Со доаѓањето на Бред и близнаците, семејството се комплетираше. Додека Анџелина престојува на сетот, популарниот актер ги чува Нокс и Вивиен, а Захара и Шајло се во зоолошката градина, додека најстарите Медокс и Пакс одат во приватното американско-француско училиште во Будимпешта.