Битолски „Транскоп“ во претстечајна постапка
БИТОЛА - Камионџиите од битолски „Транскоп“ - товарен сообраќај побарале стечај за фирмата, затоа што осум месеци се без работа и без плата. Вработените сметаат дека стечајот може да ги надмине нивните проблеми откако со менаџерскиот тим со месеци не успееја да најдат заеднички јазик и да продолжат со работа.
„На 4 септември ќе има рочиште за отворање стечајна постапка. Доаѓа инспекција, ги гледа сметките, а тие се на нула. Се' е дадено под хипотека. Многу е тешка состојбата во фирмата. На сите страни се должи“, изјави Ѓоко Баљари, претседател на синдикатот на „Транскоп“ - товарен сообраќај. Осумдесеттемина вработени во „Транскоп“ велат дека и натаму ќе продолжат да одат на работа, се' додека судот во Битола не донесе одговор на нивото барање.
Минатата недела работниците излегле со барања за исплата на платите и придонесите пред менаџерите. Исто така, бараат намирување на долговите кон доверителите и понуда на програма за надминување на кризата во фирмата. Да се свика ново собрание на акционери и да се стават во мирување одлуките од последното, бараат вработените. Но, и покрај ветувањето од раководството дека ќе им се исплатат дел од платите и дека ќе регистрира камиони со кои ќе можат да продолжат со транспорт, не било направено ништо конкретно. (А.Б.) |
