Смилевски се заканува со самозапалување

Наум Котевски

„Ако Македонија со Тошак заврши над третата позиција, ќе се полеам со бензин на плоштадот кај споменикот Алекаснадар Македонски“, ќе изјави за еден наш весник македонскиот фудбалски стручњак Зоран Смилевски од Иран, каде што трета година е на печалба. Потоа човекот кој играчката и тренерската кариера ја почна во Борац Бања Лука ќе додаде: „Тошак е само една обична фарса и нов погрешен избор. На нашиот тим му се потребни коренити промени со домашен стратег. Со ова е направена деградација на сите на наши тренери“.

Очигледно е дека кога температурите се високи како во Иран откажува системот за ладење. Повредената лична суета го насука Смилевски (самиот се пофали дека му се нудел на претседателот на ФФМ Харалампие Хаџи Ристески да го позиционира на в.д селекторското место до крајот на овие квалификации, ама овој го изиграл) на брегот на лажното и бламирачко бранење на комплетниот домашен тренерски еснаф, кој е пребогат со компетентни луѓе.

Тој сакал привремена работа во својата земја, а сег�� божем му е жал што, да речеме, Чеде Јаневски го окрка и, секако, што Хаџиевски и Јовановски се откажаа, а извисија и Шаќири, Ѓорѓиоски, Стратев.

Обидите на Смилевски за свикување на нов Смилевски конгрес на кој ќе се донесе одлука за востание против странските тренери се во најмала рака смешни. И тој добро знае дека сме имале домашни тренери во неколку квалификациски циклуси. Се сеќава ли некој на некаков успех? Тешко.

Но, затоа е лесно да се присетиме на строго затворените примитивни корелациски односи. Некој некому требаше да му ја сочува фотелјата, некој некому му одредуваше играчи и формација, некој некому му помагаше во продавањето фудбалери. Сето тоа во името на приватната фирма со псевдонимот државна репрезентација.

Е, таа наша болна реалност не ни дава надеж дека некој домашен тренер ќе успее да се спротивстави на поразителната и херметички затворена свест. Единствен кој се обиде да ја проветри просторијата и да наметне некои нови вредности, принципи и стандарди беше Среќко Катанец, но за жал беше рано задушен.

Во тој контекст апсолутно се сложуваме со членот на Управниот одбор на ФФМ, Иван Анастасовски, кој неодамна кажа дека би сакал да види Германец на клупата на националниот тим, притоа додавајќи дека Федерацијата не треба да работи по принципот на кандидатури (изборот на селектор да се претвори во избор на директор на некое претпријатие), туку треба однапред да се има во главата потребниот профил.

На играчката легенда на Ливерпул, Џон Тошак, кој постигна 96 гола во 246 настапи, треба да му се даде шанса ако може од лимитираниот играчки кадар да направи нешто повеќе. Ако не успее во тоа нека си оди. Тој, како и сите негови претходници, не е и нема да биде заштитена мечка.

И покрај тоа што е неспорен фактот дека би настанала неподнослива тишина кога луѓето би го зборувале само она што го знаат, не е пријатно да се чуше како трикратниот шампион на Мекедонија со Силекс предвреме го негира и релативизира квалитетот на најдобриот тренер во Шпанија во два наврати. Плус и шампион на таа земја со еден Реал Мадрид. Во тоа сме бездруго мајстори, меѓу првите во светот, како што сме опасно неталентирани во детектирање таленти.

Смилевски, патем, се обидува да ја изврши сатанизацијата на странските тренери и низ преку изветвениот резон дека се дојдени само да ни ги соберат парите. Ако е точно дека Тошак ќе работи за 180.000 евра годишно, тогаш крајно некоректно би било да ја анализираме споменатата сума во ова време на луди пари во фудбалот. Барем, кога станува збор за стручњаци со такво педигре.

Конечно, ако не си ја повлече навреме изјавата, Смилевски, како самозапалувач ќе остане во позиција на кандидат, макар и теоретски, за насловната страница на некој албум на Рејџ Агенст Дмашин. Тие веќе го направија тоа со славната слика на која е прикажан будистичкиот редовник Тич Кванг, кога се самозапали во 1963 година - во знак на протест против угнетувањето на будистите во Вијатнам.



РаботниЧки и ШкендиЈа веЧерва под рефлектори на „Филип Втори“



Викендов се игра третото коло од Првата македонска фудбалска лига. Дербито на колото Работнички - Шкендија се игра денеска во Скопје во вечерниот термин од 20.00 часот.

Во останатите денешни натпревари од 16.30 часот се среќаваат 11 Октомври - Металург, Напредок - Вардар, Ренова - Брегалница и Охрид - Силекс. Утре играат: Хоризонт - Тетекс.