Поттик за другите реформи
Фуере и Јанкуловска заедно го гледаа директниот пренос од Европската комисија
Тамара Грнчароска
Во наполна тишина, во просториите на ЕУ-инфоцентарот, евроамбасадорот Ерван Фуере и министерката за внатрешни работи, Гордана Јанкуловска, вчера, во присуство на медиумите го проследија директниот пренос на прес-конференцијата од седиштето на Европската комисија во Брисел за укинување на визниот режим кон Македонија, Србија и Црна Гора. Тишината ја прекина аплаузот од присутните кога од Брисел беше препорачано визите за македонските граѓани да се укинат од 1 јануари 2010 година.
Фуере по завршувањето на прес-конференцијата во Брисел, откако ја безуспешно ја чекаше Јанкуловска дваесетина минути, на која и' беше поважно да даде изјава за телевизија А1 отколку да го дочека крајот на преносот од Брисел и да со шефот на мисијата на ЕК во земјава да даде заедничка изјава, рече дека „многу често Европа се гледа себеси на крстопат, но сега ЕУ го избра вистинскиот пат, кој ќе гарантира поголема интеграција и чуство на припадност меѓу сите граѓани на континентот“. Напоменувајќи дека одлуката за визната либерализација, освен што е признание за големите напори што ги вложија македонските власти, тој рече дека тоа е и „важна порака до Владата и им демонстрира дека ако ги насочат своите мисли кон исполнување на сите останати реформи - условите, тогаш Комисијата ќе биде во позиција да препорача датум за старт на преговорите“. „Секој ден се брои“, рече Фуере, додавајќи дека она на што се надева сега ЕУ е оти суштината на пораката која ја беше испратена вчера ќе биде препознаена како важна од страна на Владата во наредните недели.
На прашањето за техничката примена на либерализацијата од страна на Грција, Фуере рече дека таа е дел од ше��ген-зоната. „Не се сомневам дека одлуката ќе се применува во сите земји од шенген-зоната, што ја вклучува и Грција“, изјави Фуере.
Јанкуловска, која дојде при крајот од изјавата на Фуере, за препораката рече дека значи оти ние имаме чисто досие и дека претставува заслуга за сработеното. Таа притоа нагласи дека прашањата од европската агенда се врвен приоритет за Владата. „Денешната препорака е само еден сегмент на патот кон нашата целосна европска интеграција“, рече Јанкуловска, додавајќи дека сега „уште повеќе сме мотивирани реформите да ги завршиме колку што е можно побрзо“.
Јанкуловска нагласи дека една четвртина од целокупната популација во Македонија поседува биометриски пасош, што е 65 проценти од оние што воопшто поседуваат пасош. |
