Претходен број

За Србија одлуката е како падот на Бастилја

Српските власти со огромно задоволство ја примија веста за препораката за визна либерализација, меѓутоа се свесни дека ќе мора уште напорно да работат за исполнување на зададените критериуми.

„Падна визниот мрак за граѓаните на Србија, но нема простор за олабавување“, изјави потпретседателот на Владата за евроинтеграции, Божидар Ѓелиќ. Тој го спореди падот на визниот мрак за Србија со падот на Бастилја на 14 јули 1789 година, но потенцираше дека мора да се продолжи со реформите за да се обезбеди стабилност и безбедност на државата за осигурување место на белата шенгенска листа и, конечно, влез во ЕУ.

Српскиот министер за внатрешни работи, Ивица Дачиќ, додаде дека Србија во претстојниот период мора да покаже дека е подготвена да продолжи да ги спроведува реформите за борбата против организираниот криминал и корупција, контрола на државните граници и административните линии, што бара соработка со ЕУЛЕКС и УНМИК.

Европската комисија ќе испрати нов документ до Србија во кој ќе бидат посочени заостанатите елементи на кои мора да се поработи за понатамошниот напредок на Србија. Документот за кој проговори и Ѓелиќ ќе се осврне на примената на законот за странци, усвојување национална стратегија за управување со миграции, акционен план за имплементација на стратегијата за борба против организираниот криминал, перење пари и финансирање на тероризмот.

Комесарот што ја пренесе веста за предлогот за визна либерализација на државите од Западен Балкан, Жак Баро, укажа дека најголемиот проблем на Србија е управување со административната граница со Косово и соработката со ЕУЛЕКС. Тој најави дека Комисијата ќе продолжи да праќа свои мисии во државата со цел да се провери дали се исполнуваат преостанатите зададени услови. (М.П.)