Претходен број

Награда за граѓаните на Македонија

Премиерот Груевски и' ја препиша целата заслуга за укинувањето на визите на Владата

„Ова е голем успех на нашите граѓани, на Македонија и на европската идеја во Македонија“, изјави вчера премиерот Никола Груевски, поздравувајќи ја препораката на Европската комисија за визна либерализација на Македонија. Заслугата за визната либерализација, Груевски и' ја припиша на Владата. „Оваа Влада си постави за цел да ги исполни сите неопходни услови и критериуми за воспоставување безвизен режим со Европската унија и во тоа успеа“, констатира Груевски. „Со овој чекор на Комисијата, македонските граѓани се приближуваат до придобивките на европската идеја. Македонија со силна посветеност и волја ги заврши започнатите реформи кои се предуслов за укинување на визниот режим и со тоа докажа дека ЕУ има рамноправен партнер на овие простори“, рече Груевски. Тој истовремено забележа дека досега на овој план не било направено ништо.

„Овој процес не беше нималку лесен и едноставен затоа што на овој план не беше направено речиси ништо. Се соочувавме со бројни пречки и проблеми, но нашата цврста определба ни помогна да ги надминеме и да го постигнеме овој успех“, истакна шефот на Владата. Тој уверува дека Владата е целосно посветена и дека со несмален интензитет ќе продолжи да ја вложува потребната реформска енергија и ресурси во процесот на европските интеграции на државава. „Продолжуваме посветено да работиме на добивање позитивен извештај за добивање на датум за почнување преговори со ЕУ“, додаде Груевски.

Тој оцени дека Македонија чекори напред и се отвора кон светот, иако некои, како што рече, ќе го оспорат тоа. „Некои можеби и ќе се обидат овој успех да го оспорат, некои ќе се обидат поради дневна политика да го претворат во поле за препукување и дополнителни поделби, но ова е реален успех и сите треба да сме горди на тоа“, смета Груевски.

Поранешниот премиер, социјалдемократот Владо Бучковски ја поздравува препораката на Европската комисија и се надева дека и Советот на министрите ќе донесе позитивна одлука. „Испратена е силна порака, ова е награда за граѓаните на Македонија и за граѓаните на регионот. Се надевам дека власта, пред се' ВМРО-ДПМНЕ нема да ја злоупотреби препораката за визна либерализација и нема да игра на картата дека ова може да биде замена за датум за преговори. Груевски треба да знае дека Владата за приближувањето кон ЕУ се оценува во октомври, а визната либерализација е признание до сите македонски граѓани“, ни изјави Бучковски.

Експремиерот напоменува дека нема потреба од еуфорија и триумфализам, потсетувајќи дека во периодот кога Македонија доби кандидатски статус , Црна Гора се формираше како држава. „Како што стојат работите, се плашам дека по четири негативни извештаи, повторно во октомври ќе добиеме негативен извештај од ЕК“, стравува Бучковски..

И шефицата на пратеничката група на Нова демократија, Флора Кадриу ја поздравува препораката визна либерализација, но, и таа предупредува да не се претерува со еуфоријата. „Сепак, тоа е само првична одлука која допрва треба да стапи во сила, и второ сметаме дека визната либерализација не смее да биде замена за зачленувањето на Македонија во НАТО и во ЕУ“, изјави Кадриу.

Либерално-демократската партија на сите македонски граѓани им го честита за визната либерализација. „Со оваа одлука на Европската комисија се круниса напорот и работата на повеќе влади и состави“.

ЛДП ги осудува обидите на Владата да ја злоупотреби одлуката за визна либерализација како покритие за недобивање, четврта година по ред, датум за почеток на преговорите. Добивањето датум за почеток на преговорите е клучниот чекор на интеграцијата во Европската Унија“, изјави Едмонд Адеми од ЛДП изразувајќи жалење што и по две години откако ни се дадени осум одредници, Владата не ги исполнила обврските. Адеми го повтори обвинувањата за притисок врз судството и партизирање на администрацијата. Директорот на Центарот за комуникации на ВМРО-ДПМНЕ, Илија Димовски поздравувајќи ја препораката на ЕК, рече: „Тоа е доказ дека Македонија продолжува да чекори кон патот на интегративните процеси кон Европската унија и дека за граѓаните на Македонија ќе има подобра иднина“, изјави Димовски.

Потпретседателот на ДУИ, пратеникот Џеват Адеми со нескриено задоволство препораката за визна либерализација ја коментираше како добра, посакувана и очекувана вест. Адеми е полн со оптимизам дека ваква убава вест Македонија ќе добие и во октомври. „Најголемите придобивки ги имаат граѓаните на Македонија и ние се радуваме како секој друг граѓанин. Ова е еден вид награда и за сработеното и за определбата, ориентацијата на сите граѓани да станеме членки на големото семејство - Европа“, изјави Адеми. (О.В.-Ж.Х.З.)