Градежниот инспекторат затропа и на вратите на Општина Охрид

Охрид - Општина Охрид деновиве добила известување од Државниот градежен инспекторат при Министерството за транспорт и врски за непостапување по предмети што се однесуваат на уривање на бесправно изградени угостителски објекти во манастирскиот комплекс „Св. Наум“.

Градоначалникот на Охрид, Александар Петрески, вели дека не станува збор за одземање на ингеренции на општината за посочените предмети, туку за укажување што ќе биде уважено.

„Станува збор за мислење во кое се посочува проблемот со изградба на нелегални објекти во Св. Наум. Ние сега проверуваме каква дозвола за работа имаат постојните објекти таму, бидејќи тие се издадени пред 15-20 години, а не сега, и кон сите што немаат соодветна дозвола или имаат изградено повеќе отколку што им било дозволено ние ќе реагираме“, изјави градоначалникот Петрески.

Тој е уверен дека на Општина Охрид нема да и' бидат одземени ингеренциите во областа на урбанизмот, бидејќи локалната самоуправа ќе постапи согласно со Законот и ќе го реши проблемот со нелегално изградените објекти во Св. Наум. (Г. М.)