Попова Шапка без спасители среде сезона

Дваесет и седумгодишна девојка од Скопје е тешко повредена откако спуштајќи се со сноуборд по патеката поради густата магла удрила во карпа. Инцидентот се случи во неделата попладне

ТЕТОВО - Скијачкиот викенд на Попова Шапка го одбележа стравотна несреќа што се случи завчера напладне на падините на планината. Дваесет и седумгодишна девојка од Скопје е тешко повредена откако спуштајќи се со сноуборд по патеката поради густата магла, ненадејно удрила во карпа. Со повреди на грбот и на главата таа најпрво била примена во тетовската болница, од каде што е препратена на лекување во Скопје. Несреќата на скијачките терени го отвори прашањето за безбедноста на вљубениците во зимските спортови. Поради непостигнат договор меѓу скијачкиот центар и луѓето од горско-спасителната служба, годинава овој познат скијачки центар остана без спасители, што ја доведува во прашање безбедноста на посетителите.

Несреќата се случила во неделата кога скопјанката Е.Д.(27) се рекреирала на падините на Попова Шапка, возејќи сноуборд. И покрај лошото и магливо врем��, таа околу 13 часот се искачила на падините на Церипашина. Спуштајќи се по надолнината, неочекувано удрила во големата карпа, која поради густата магла, веројатно, не ја забележала. Од силниот удар се здобила со тешки повреди на грбот и на главата.

Среќна околност е што на местото на несреќата се нашле други скијачи, кои веднаш притрчале да помогнат. Повикана била и Брза помош. Лекарите што пристигнале на Попова Шапка сметале дека е најдобро да се повика хеликоптер што ќе ја пренесе повредената во болница. Но, поради густата магла, хеликоптер не можел да слета на местото на несреќата. Во свесна и контактибилна положба, повредената девојка била пренесена во тетовската Клиничка болница од каде што е испратена на лекување во Скопје.

Оваа несреќа укажува на неминовната потреба од организирана и постојана горско-спасителна служба на Попова Шапка, како и преземање други мерки за заштита на посетителите, особено на скијачите – почетници од несакани несреќи.

Тетово располага со обучени горско-спасители, кои многупати досега ја потврдиле својата спремност и брзина во интервенциите. Меѓутоа, како што дознаваме, за оваа зимска сезона не бил постигнат договор меѓу скијачкиот центар и луѓето од горско-спасителната служба поради што нивни луѓе нема на Попова Шапка. (Г.Е.)