На мобилен 5,3 милијарди луѓе

До крајот на годинава бројот на претплатници на мобилната телефонија ќе достигне 5,3 милијарди, во однос на 4,6 милијарди на крајот на 2009 година, е прогнозата на Агенцијата за обединети народи за информациска и телекомуникациска технологија.

Мрежата за мобилна телефонија уште сега е достапна на повеќе од 90 отсто од светската популација. Стапката на влез на мобилни телефони на пазарот на развиените земји изнесува 68 отсто, со што е постигнат висок степен на заситеност, отколку кај другите технологии, покажува извештајот објавен на годишната конференција на Меѓународната унија за телекомуникации во Гуадалараја.

Силен скок е забележан и на подрачјето на пристапот на Интернет, покажува извештајот. Така, бројот на корисници на Интернет е двојно зголемен во изминатите пет години и до крајот на 2010 година ќе достигне две милијарди. Притоа, се проценува дека пристапот до Интернет во сопствен дом имаат 1,6 милијарди лица, во однос на 1,4 милијарди на крајот од 2009 година.

Авторите на извештајот, сепак, укажуваат на континуиран огромен расчекор меѓу развиените земји и земјите во развој. Така, до крајот на оваа година 71 отсто од жителите на развиените земји ќе имаат можност за пристап до Интернет, во однос на само 21 отсто во земјите во развој.

Притоа, во развиените земји 65 отсто од жителите ќе можат да пристапат до Интернет во сопствените домови, во споредба со само 13,5 отсто во земјите во развој, каде што главни места за Интернет-пристап се училиштата, работните места и јавните установи.

Големи се разликите и меѓу одделни региони, па така на Интернет сурфаат 65 отсто од жителите на Европа, во однос на само 9,6 отсто во Африка. (ИЦТ- свет)