Радикалниот исламизам маршира

Многубројните скандали и афери во ИВЗ ги делат верниците

Светлана Унковска


Тепачката меѓу двете групи што се случи минатиот петок во Иса Бег џамијата меѓу групата на оџата Рамадан Рамадани и Скопското муфтиство, Исламската верска заедница ја оцени како напад од страна на криминално-вахабистичка банда, која во Скопје е позната по своето радикално дејствување.

Како предводник во ширење на радикалниот ислам и криминалот, ИВЗ го посочува Рамадан Рамадани кој беше суспендиран од страна на Скопското муфтиство.

Со ова ИВЗ и официјално признава дека во Македонија веќе подолг период се шири фундаментализмот, финансиски поддржан од криминални структури.

Рамадани вчера контрадикторен. Најпрво ги отфрли обвиненијата за ширење радикален исламизам, а потоа рече дека тие не дејствувале организирано, туку индивидуално.

„Никој не ме разрешил. Тие донеле некаква си мистериозна одлука без никакво образложение зошто ме разрешуваат. Мене може да ме разреши само Реисот, односно поглаварот. Муфтиството нема надлежност за ме разрешува“, изјави Рамадани, кој истакна дека тепачката се случила кога одредена група насилно се обидела да ја прекинат молитвата во џамијата.

„Многубројните скандали и афери и внатрешни пресметки во ИВЗ ги делат верници. Оттаму и дојде до инцидентот. Тоа беше пресметка меѓу две групи верници и затоа ја повикувам ИВЗ да стави крај на ваквите случувања, да не ги дели верниците и да го врати угледот на оваа институција“, истакна вчера Рамадани.

ИВЗ вчера остро возврати обвинувајќи го Рамадани дека тој со својата група шири радикализам и ги тероризира граѓаните.

„Гробот кој сака да им го ископа на ИВЗ сега треба да им припадне нив и горди сме што не потпаднавме под нивното сценарио подготвено од вахабистичко-радикални структури. Одлуката за неговата суспензија е во согласност со уставно-правните норми на ИВЗ и секое на��тојување Рамадани да ја прогласи за нелегитимна е уште еден жив доказ дека вахабистичко криминалните структури, чиј дел е и тој се за непочитување на институциите и Уставот на ИВЗ. Тој одлуката за хатиб ја има земено со насилство, закани и оружје. Ова покажува дека Рамадани со својата група е за анархија, насилство, малтретирање и радикализација на граѓаните. Ние остро го осудуваме насилството и бараме од државните институции да го решат случајот и криминалните радикални групи кои оперираат во џамиите да ги седнат на клупата на правдата“, реагираат од ИВЗ.

Иса Бег-џамијата како верски објект наменет за молење, минатиот петок беше претворен во вистинска арена. Граѓаните со исламска вероисповед кои дојдоа на молитвата беа сведоци на скандалозен конфликт меѓу поддржувачите на Рамадан Рамадани и Скопското муфтиство. Најдебелиот крај, сепак, го извлече поранешниот пратеник на ДПА, Ештреф Алиу, кој доби неколку тупаници. Инцидентот избувнал откако на Рамадани не му било дозволено да држи верски проповеди затоа што бил суспендиран од главниот скопски муфтија Ибраим Шабани. За „Иса-бег“, како и џамиите „Јахја-паша“, „Султан Мурат“, „Алаџа“ и „Тутунсус“, веќе подолго време се тврди дека се упоришта на вахабистите кои преку проповеди шират радикален исламизам и тоа преку придобивање млади кои се учат да ги прифаќаат обичаите, однесувањето и начинот на облекување.

МВР врз основа на видеоснимката вчера поднесе прекршочна пријава против Бесник Ејуп, вработен во Агенцијата за млади и спорт поради напад врз експратеникот Ештреф Алиу врз кого се нафрли со тупаници и клоци. Истовремено, прекршочни пријави ќе бидат поднесени и за другите учесници во оваа тепачка.

Лентата со снимената тепачка ги лиферуваше ДПА, обвинувајќи дека зад групата на Рамадани стои градоначалникот на Чаир, Изет Меџити. Тој вчера не беше достапен да одговори на ваквите обвиненија.

Во инцидентот во џамијата „Иса-бег“, во која се случи физичка пресметка меѓу групата приврзаници на оџата Рамадани и скопскиот муфтија Ибраим Шабани, длабоко е вмешана политиката, тврдат извори за „Утрински весник“, кои сакаат да останат анонимни. Во целиот скандал се вмешани две групи, од кои едната е на ДУИ, а другата на ИВЗ. Целата битка е да се преземе ИВЗ, односно управувањето со прилично големите приходи и имоти. „Парите и моќта се единствените причини за целиот овој скандал, а зад сето ова стојат интересите на политичките партии“, велат нашите извори. Неофицијално се тврди дека нетрпението меѓу раскараните групи, кое трае од поодамна, сега кулминирало, откако Рамадани излезе во јавност со барање за изградба на Бурмали-џамијата и директни обвинувања кон ИВЗ. Иако и двете страни се залагаат за нејзина изградба, сепак, реисот Сулејман Реџепи е соочен со напади од другата страна, дека уште со претходната власт, кога ДПА беше на власт, се договорил во замена на изградба на џамијата да добие нов објект на Кале.