Не го бојкотираме Уставен суд

Судскиот совет проценил дека нема потреба да се произнесат околу иницијативите за оспорените правилници пред Уставен суд, бидејќи сметале дека секоја институција треба да си ја работи својата работа. Тие го оценуваат како „невкусен“ и коментарот на претседателот на Судот, Трендафил Ивановски, кој остро ги критикуваше поради лошата соработка. „Имаме право да дадеме одговор на иницијативата, но наше право е дали ќе го користиме. Наша оцена беше дека нема потреба од одговор на поведените иницијативи. Ние очекуваме и сме со убедување дека Уставниот суд си ја врши работата како што треба, а ние нашата“, изјави вчера по седницата претседателот на Судскиот совет, Васил Грчев.

Тој вели дека изготвувањето на конкретните правилници биле нивна законска обврска. „Законот бараше во определен рок да донесеме правилници околу текот на постапка за утврдување нестручно и несовесно работење, како и за дисциплинска постапка“, вели тој. (Г.Д.)