Шверцери на луѓе низ земјава уапсени во Србија и во БиХ
Уапсени се 24 лица, кои изминативе шест месеци заработиле околу 300.000 евра
Дваесет и четири лица се уапсени поради трговија со луѓе во големата акција на српската и на босанската полиција, во која помогнаа полициите на Хрватска и на Словенија, како и царините на 13 земји од Југоисточна Европа. Српското министерство за внатрешни работи соопшти дека станува збор за шверц на турски и на албански државјани кон земјите на Европската унија, наведувајќи дека рутата минувала и низ Македонија. Според истрагата, досега успешно биле прошверцувани повеќе од шеесетина илегалци, за што шверцерите наплатиле околу 300.000 евра.
Меѓународната полициска акција, што започна на почетокот на годината, резултираше завчера кога беа уапсени 24 члена на криминалната група.
„Акцијата се однесуваше на спречувањето на шверцот на албански и на турски државјани од Турција, Македонија, Србија, Црна Гора, Хрватска, БиХ и натаму кон земјите од ЕУ“, се вели во соопштението на српското МВР.
Половина од уапсените се фатени во Србија, а половина во БиХ. Меѓу оние кои и' паднаа в раце на српската полиција се и Џелал Сулејмани (39) од Прешево, кој се смета за организатор на шверцерскиот синџир, како и Неџат Ибрахими (37) од Бујановац, кој се грижел за трансферот на пари меѓу припадниците на криминалната група и за комуникациите. На овие двајца, како и на останатите членови на групата, им е одреден дводневен притвор.
Истрагата утврдила дека организаторите спроведувале групи од четири до осум мигранти, главно, малолетници од Албанија, кои преку добро востановени рути пристигнувале во Трст. (Г.А.) |
