Судијката без имунитет, но и без притвор
Судскиот совет не донесе одлука со која на судијката од Основниот суд во Штип, Лилјана Јанков, ќе може да и' се одреди притвор за аферата во која се инволвирани татко и син од Радовиш. Тоа значи дека судијката останува без имунитет, но оти во натамошниот тек од кривичната постапка, во која таа се товари за сторена злоупотреба на службената положба и овластување, ќе може да се брани од слобода.
Освен судијката Јанкова, за злоупотреба на службената положба ќе одговараат уште тројца други вработени во катастарот, но и тие се здобија со можност во натамошниот тек од постапката да се бранат од слобода.
Единствените кои уште од минатиот понеделник се во 30-дневен притвор се таткото Кирил (56) и синот Марјан Сарамандов (32), познати бизнисмени од Радовиш. Тие се осомничени дека преку компанијата „Радовишки пазар“ станале мнозински акционери на АД „Хунап“ со изигрување на другите акционери, но и на Фондот за пензиско и инвалидско осигурување. Според МВР, со незаконското работење тие се здобиле со имотна корист од 200.000 евра, а имотот на „Хунап“, во кој спаѓа и хотелот „Панорама“, станал нивна сопственост. (Љ.С.) |
