Тројца повредени во Куманово
КУМАНОВО - Три лица се повредени во инцидент што завчеравечер се случи пред дискотеката „Нота бас“ во Куманово.
СВР-Куманово вчера соопшти дека во средата вечер, околу 20 часот, пред дискотеката на улица „Трета македонска ударна бригада“ во Куманово, сопственост на браќата Г.О. (28) и Л.О. (19) од кумановското село Опае, пристигнале четири лица од Арачиново и тоа А. С. (20), Д. З. (31), Ш. М. (34) и А. Б. (24). По кратка расправија групата арачиновци со метални шипки го нападнале постариот брат Г.О. пред влезот во дискотеката. На нападот реагирал помладиот брат Л.О., кој влегол во дискотеката да земе пиштол и на излегување истрелал четири куршуми во насока на групата од Арачиново. Три куршуми завршиле во стомакот и еден куршум во ногата на А.Б. од Арачиново.
Потоа групата од Арачиново набрзина го зела ранетиот А.Б. и се упатила кон Скопје. На влезот во Арачиново групата е пресретната од страна на тамошната полициска патрола. Ранетиот е пренесен во Ургентниот центар во Скопје, а останатите тројца арачиновци се приведени на распит во полицијата.
Мотивите за инцидентот во Куманово се утврдуваат, а неофицијално се зборува дека се во прашање нерасчистени должничко-доверителски односи. (Ст.Б.) |
