Крајно време е да се реши името

Премиерот Никола Груевски смета дека е крајно време да се реши проблемот што го има Грција со нашето уставно име, но смета дека барањата на јужниот сосед се максималистички. „Мислам дека е крајно време да се реши проблемот со името, но се' уште сметам дека барањата на Грција се максималистички“, изјави премиерот Груевски одговарајќи на прашање по поставувањето камен-темелник на фекалната канализација во Катланово. Прашан дали во Њујорк ќе има средба со грчкиот премиер Јоргос Папандреу, премиерот Груевски рече дека моментално нема ништо закажно.

На прашањето дали новиот амбасадор во НАТО, Мартин Треневски, сериозно може да одговори на новите обврски, премиерот Груевски рече дека Треневски е човек што се бори и ќе се бори Македонија да стане полноправна членка на НАТО. „Амбасадорот Треневски даде интервју во кое ги појасни своите ставови. Станува збор за човек што силно се бори и ќе се бори Република Македонија да стане членка на НАТО“, рече Груевски. (МИА)