Политичарите се вратија, името уште на одмор

Од нашиот дописник Миркица Поповиќ

Атина - Во Грција се случуваат многу работи, но ниту една од нив нема врска со спорот за името. Портпаролот на грчкото МНР, Григорис Делавекурас, ни изјави дека нема никакво ново придвижување околу спорот со Македонија, ниту, пак, дека има каква било најава за средба меѓу премиерите Никола Груевски и Јоргос Папандреу. Негативен беше одговорот на Делавекурас и за шпекулациите дека се очекува есенва на Генералното собрание на Обединетите нации да има нов предлог од медијаторот Метју Нимиц. Од Атина се воздржуваат од реакција и околу вжештената тема за новиот македонски амбасадор на Македонија во НАТО, Мартин Треневски, истакнувајќи дека е тоа наша работа и дека не би сакале да го коментираат неговиот настап и што значи тој за спорот околу името.

Се чини за спорот единствено се придвижуваат и напредуваат шпекулациите. Од наша страна е можно да сме во блага предност со шпекулирање, ако се земе предвид дека во време на главоболки од економската криза успеавме да ги насмееме барем грчките новинари со најавата дека Папандреу ќе дојде на отворањето на новиот супермаркет „Веро“. Во текст на вчерашниот весник „Катимерини“ се забележува дека нешто чудно се случува во грчкото МНР неделава, бидејќи, како што велат, горат телефоните од повици на новинари од ФИРОМ, кои сосема сериозни прашуваат дали ќе дојде Папандреу на отворањето на новиот маркет на „Веро“ во Скопје следната недела.

„Ни категоричните негирањата на Делавекурас и ��а неговите колеги за оваа вест не ги убедија новинарите, па така телефоните продолжуваат да ѕвонат. Веројатно, колегите дознале дека заменик-министерот за надворешни работи, Димитрис Друцас, се врати од 10-дневниот одмор и решиле малку да го нервираат “, пишува „Катимерини“.

Папандреу нема да купува во новиот шопинг-центар во Скопје, а мистерија ќе остане дали веста во македонските медиуми е еден вид индиректна покана од премиерот Никола Груевски, кој, како што се дознава, е поканет на отворањето на шопинг-центарот, за „дружба“ со неговиот грчки колега.

„Се сомневаме дека Папандреу би отишол да присуствува на отворањето во Скопје, бидејќи нема напредок во преговарачкиот процес, освен, секако, ако не сака многу порано да го испрати кај Господ почитуваниот солунскиот митрополит (кој е жесток поборник против користење на името Македонија, дури и во сложена форма како Северна Македонија, н.з.)“, се вели во текстот од „Катимерини“.