Градежна инспекторка од скопската населба Гази Баба, урбан полицаец и негов пријател завршија во дваесетдневен притвор поради земање поткуп. Според МВР, тројцата поделиле 500 евра што ги изнудиле од сопственик на градба за што тој немал дозвола и требало да се урне.
Првопријавена е раководителката на урбанистичко-градежната инспекција во општина Гази Баба, која заедно со урбаниот полицаец, преку трето лице И.Д. ги побарале парите од скопјанецот, кој немал одобрение за градба на објект на улицата „Маџари-2“, во општина Гази Баба.
Според полициската истрага, сопственикот на му бил побаран поткуп за да не му го урнат објектот во почетокот ги одбивал ваквите „непристојни предлози“, за на крај, сепак, да попушти и да им даде 500 евра. Претходно тој случајот го пријавил в полиција, која што му дала обележани пари за да ги фати уценувачите.
Средбата се случила во петокот, во кафеана во населбата Автокоманда, каде што сопственикот на објектот ги донел бараните пари. Откако ги зеле, уценувачите со нив си ги плаќале сметките, а останатиот дел од парите го поделиле меѓу себе. Кај фабриката ФАС „11 Октомври“ полицијата го пресретнала возилото во кое се наоѓале и кај нив ги пронашла обележаните пари, по што лицата се приведени. (Х.Р.)
