Стоечки овации во Карнеги хол за Симон Трпчески

Стоечки овации доби нашиот пијанист Симон Трпчески, на деби настапот во една од најпрестижните светски концертни сали – њујоршкиот Карнеги хол. Добитната комбинација на нашиот пијанист, светската диригентка број еден, Марин Олсоп и носителот на „Греми“ – Балтиморскиот симфониски оркестар, ја кренаа на нозе пребирливата публика во Карнеги хол, изведувајќи го Концертот за пијано и оркестар бр. 3 од Сергеј Прокофјев.

Диригентката Ослоп изјави дека го поканила Симон за сите нејзини специјални изведби. „Тој го направи своето деби со мене и во амстердамската сала ’Концертгебау‘ со тамошниот оркестар. Знаев дека ова ќе биде негово деби во Карнеги хол и го поканив бидејќи сметам дека е феноменален пијанист, прекрасен музичар со големо човечко срце. Вечерва свиреше како што очекував, спектакуларно“, оцени Марин Олсоп.

Возбудата и задоволството од одличниот прием не ги криеше ни пијанистот Трпчески, кому се' уште не му се верува дека го имал своето деби во Карнеги хол. „Бев почестен од поканата на Балтиморскиот симфониски оркестар и нивниот шеф-диригент Марин Олсоп, да настапам со нив во оваа сала. По двата навистина успешни настапа во Балтимор, ова беше убаво заокружување на концертната серија. Салата беше распродадена и морам да кажам дека чувството е прекрасно, бидејќи се работи за една од најубавите и најпрестижни концертни сали во светот. Во секој случај дадов се од себе во изведбата на еден толку комплициран концерт, каков што е третиот на Прокофјев. Навистина сум пријатно изненаден, особено од фактот што ретко се случуваат стоечки овации од публика, која има можност буквално постојано да го слуша најдоброто од најдоброто. Ова е незаборавен момент од мојот живот, што ќе ме мотивира и понатаму да се трудам да го повторам ваквото чувство кај публиката, која практично ми се поклони на нозе“, истакна возбудено Симон Трпчески.

На концертот присуствуваа и министерката за култура Елизабета Канческа - Милевска и нашиот амбасадор во САД, Зоран Јолевски. Министерката Канческа - Милевска изјави дека особено и е мило што концертот бил толку успешен, со големи овации во преполната сала. Таа додаде дека на концертот се надоврзаа и отворањето на големата изложба од 90 дела на уметницата Вана Урошевиќ во Македонскиот културен центар, како и концертот на Четкар во нашата амбасада во Вашингтон, кој се одржа по повод празникот на благодарноста. „Сметам дека овие нек��лку денови имавме навистина успешна презентација на македонската култура и творештво во Соединетите американски држави“, изјави Канческа - Милевска.

Следна концертна дестинација на Симон Трпчески е Универзитетот во Чикаго, закажано на 19 ноември. Пред тоа, Трпчески заминува за Париз каде што ќе присуствува на свеченото доделување на престижните француски музички награди „Златен дијапазон“, за кои е номиниран со својот прв оркестарски компакт диск. (К.Р.)